MIRI: Sarawak ngarapka ulih numbuhka kaul ke manah enggau institusyen lumba enggau main Korea.
Sapit Menteri Lumba enggau Main, Datuk Lee Kim Shin madah, tu deka nyikap rebak baru enggau mayuh agi pegelandik sereta penau dalam aktiviti lumba.
“Aku berasai teperansang bendar deka bejalaika pemanah kaul enggau institusyen lumba enggau main di Korea udah bekau nemuai ngagai Universiti Lumba enggau Main Nasional di Korea bedau lama ke udah.
“Penemuai nya mujur bendar lalu mayuh bengkah pekara udah dipelajar. Enggau nya aku ngarapka menua nya deka mantu kitai dalam latih ba pengawa lumba enggau pekara ke bekaul,” ku iya bejaku ba sebengkah pengerami di sebengkah hotel ke tebilang ditu, malam Hari Satu tu tadi.
Lee mega minta program pengedut kaul antara Sarawak enggau Korea diterus ngambika peranak menua kitai ulih belajarka main asal enggau jaku sereta sumai pakai enggau mega aktiviti ti ngerinduka ati sebaka mega ngagai bala sida peranak menua Korea.
Iya madah, Sarawak sanggup mantu nembiak sekula ari Korea belajarka Jaku English.
Ba kaul tu, iya ngelaluka bala nembiak sida belajar ba Curtin University, Kampus Sarawak ditu.
“Aku ngarapka meda mayuh agi temuai ari Korea datai kitu dikena ngedut kaul sereta negapka jantil pengawa,” ku Lee.
Lee beterimakasih ngagai opis pelajar di Korea Selatan ke pemanah ngintu aku maya nemuai kin bedau lama ke udah.
Pengerami kena Hari Satu tu tadi nya dikena ngelaluka 13 iku bala pengajar enggau prinsipal ari Korea Selatan, ke betuanrumahka Opis Kunsil Lumba enggau Main Sarawak.