Anda di sini

Raban polis patut ngemeratka disiplin lebuh maya gawa

Advertisement

KUCHING: Opis Menteri Dalam Menua (KDN) enda bekrompomi enggau raban polis ti ilap maya bejalaika tanggung pengawa nyentukka lenyau senyata api.

Sapit Menteri Datuk Wan Junaidi Tuanku Jaafar madah, randau begulai enggau Kepala Polis Malaysia deka diatur, berundingka chara ngangkatka tikas disiplin raban polis.

Ku iya, pekara nya patut dikemerat ngambika ulih nentu tiap iku raban polis enda ngirup ai bisa tauka mabuk maya kereja.

“Kitai (KDN) enggau raban ketuai polis renggat tinggi enda deka bekrompmi enggau pekara tauka penyalah ke bansa nya.

“Aku deka berandau enggau Kepala Polis Malaysia berundingka chara ngangkatka tikas disiplin polis lalu nentuka sida enda mabuk maya kereja,’ku iya kemari.

Iya mansutka jaku nya maya ngenang pengilap raban polis nyentukka lenyau senyata api.

Wan Junaidi nambah, raban polis ti udah ngelenyauka senyata api deka diukum ketegal pengilap sida.

“Aku ngarapka raban polis enda ngirup ai bisa maya sida mai senyata tauka ngena unifom,”ku iya.

Kitai enda nagang sida ngirup ai bisa tang pengawa nya patut dikereja maya sida enda gawa.

“Raban polis patut mandangka chunto ti manah lalu ukai ngamahka imej polis,” ku iya.

Advertisement