MIRI: Penerima Bantu Rayat 1Malaysia (BR1M) di Baram dilalau nyerenih penerang sida di Opis Asil Dalam Nengeri, sebedau tauka enda laun ari 31 Januari tu.
Kaban Kunsil Nengeri Telang Usan, Dennis Ngau madah, pekara ke patut diserenih sida baka penerang ke silik sentang akaun bank nyengkaum ubah endur sida diau enggau sitak sida ngundi.
Ku iya, pengawa nyerenih penerang nya mega tau digaga nengah chara online tauka terus ngagai Opis Asil Dalam Nengeri.
“Pengawa nyerenih penerang nya beguna amat lebih senentang akaun bank, laban BR1M deka dipasukka terus ngagai akaun sida,” ku Dennis.
“Pekara nya deka ngemudahka peranak menua pesisir enggau ulu entigis, laban sida tau enda ibuh datai ngambi baucher nya baka suba.
“Kelimpah ari nya, baucher nya meh enda tau enda disilih ngena mata duit dalam timpuh ti udah ditetapka, ke alai mayuh orang enda ngasaika bantu nya,” ku iya.
Ku iya, barang sapa ke nadai akaun bank tetap deka nerima bantu ari perintah nya nengah chara nerima mata duit.
Iya mega ngelalau orang ke baru minta tauka ngapil, nganjung peminta sida nengah chara online tauka nganjung pom ke udah diisi sebedau ujung bulan tu.