Iya mega meransang ejensi tauka opis ke ngembuan mayuh pengereja pengawa numbuhka palan pengintu nembiak mit
UNGKUP KITA: Fatimah nyuaka chek MRP ungkup Kelab Sukan dan Rekreasi Opis Pengerai Pelilih Kuching ke diterima Kamaruddin.
KUCHING: Perintah meransang pengawa numbuhka taska di palan endur gawa ke nyadi sebengkah ari atur meri sukung ngagai raban apai indai ke kereja.
Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah madah, dikena ngemujur inisiatif nya, perintah nyendiakka RM200,000 ngagai tiap opis menteri enggau ejensi bukai ti deka numbuhka taska.
“Ketegal pedis deka ngiga pemantu rumah pengudah kededua apai indai kereja, opis menteri meransang ejensi ke ngembuan mayuh orang gawa numbuhka taska.
“Penumbuh taska deka nguntungka kededua apai indai enggau ejensi ke alai bala anak deka disedia bilik endur diau lalu deka dikemata sereta diajar orang ke ngembuan pengelandik.
“Agih RM200,000 nya dikena nusun baru bilik ke disedia ungkup taska lalu kena meli perengka ke diguna,” ku iya ba pengerami Makai Lemai Kelab Sukan Dan Rekreasi (KSR) Opis Pengerai Pelilih Kuching di sebengkah hotel ditu, malam ensanus.
Kelimpah ari nya, Fatimah mega netapka sabsidi bayar taska penyampau RM180 sebulan ungkup seiku anak diberi ngagai apai indai ke ngembuan gaji kurang ari RM5,000 ti nganjung anak sida ke taska berengkah bulan Januari 2014.
“Perintah mega meri bantu bayar taska penyampau RM250 sebulan ngagai apai indai ke begaji kurang ari RM920 ti nganjung anak sida ngagai taska swasta ke udah ngerejister diri ba Opis Pengintu Pengelantang Pendiau (JKM) berengkah Januari 2014,” ku iya.
Iya nambah, naka ke diatu bisi empat buah taska udah bejalaika operasyen iya nya Taska Yayasanku Sayang, Taska Nur Wiswani Biro Wanita, Taska Permata Perpaduan Komplek Persekutuan Kuching enggau Taska Institut Kemahiran Belia Negara (IKBN) pampang Miri lalu dua buah agi benung diperunding ditumbuh iya nya di SMK Subis enggau UNIMAS.
Ba pengerami nya, Fatimah ke mega Kaban Kunsil Nengeri Dalat ngagihka RM3,000 nengah geran MRP ngagai KSR Opis Pengerai Pelilih Kuching.
Ba kaul ke sama, Pemesai Pengerai Opis Pengerai Pelilih Kuching Dr Kamaruddin Lajim ngansak mayuh agi raban orang gawa opis nya ti mungkur penyampau 1,400 iku ngerejister diri nyadi kaban kelab.
Iya ke mega nyadi penyanding penemu kelab madah naka ke diatu kelab semina bisi 400 iku kaban ke udah ngerejister lalu agi jauh kurang ari penyampau semua pengereja pengawa opis nya,
“Kitai deka matak mayuh agi pengereja pengawa opis tu ngerejister diri nyadi kaban kelab. Mayuh agi tubuh kitai, tegap agi kelab kitai.
“Aku pechaya, nengah program sosial ke diatur kelab kaul entara tiap aku orang gawa deka majak rat lalu tau endar ngangkatka tikas pemanah pengawa opis tu,” ku iya.