KUCHING: Hotel Riverside Majestic Kuching enggau Miri Marriot Resort Spa entara 10 buah hotel dalam menua tu ke nerima gelar The ASEAN Green Hotel 2014 nyerumba ASEAN Tourism Forum 2014.
Gelar nya disuaka Menteri Dagang Temuai Malaysia Dato Seri Mohamed Nazri Abdul Aziz ke alai penyampau 88 buah hotel ari 10 menua ASEAN bisi nerima gelar ke sama.
“Berindik ari pengerembai industri dagang temuai ba serata dunya, gaya baru dagang temuai ngemeratka pekara ngintu pemaik rampa menua ‘everything Green’.
“Penumbuh ASEAN Green Hotel Standard ngelaika setindit ke udah ditetap ASEAN,” ku Nazri ba jaku pengelalu pengerami nya lemai kemari.
Setindit ngenukuka operasyen ‘green hotel’ ke dipejalai enggau profesyenal nitihka pelin ngintu pemaik rampa menua, produk gadung sereta modal mensia ti deka nentuka kandang endur ngelingi sereta komuniti teulihka penguntung, tandu iya.
Nazri mega madah tebal agi orang dagang temuai diatu milih diau di green hotel lalu enti dikira ungkup timpuh panjai, kos operasyen green hotel jauh kurang ari hotel bukai lalu tau mulaika penguntung ti besai.
Lapan hotel bukai menua tu ke bela nerima iya nya Shangri-La’s Tanjung Aru and Spa Kota Kinabalu, Mandarin Oriental Hotel, The Andaman Langkawi, The Shangri-La’s Rasa Sayang Resort and Spa Penang, The Shangri-La Hotel Kuala Lumpur, Nexus Resort Karambunai Kota Kinabalu, Shangri-La’s Rasa Ria Resort Tuaran enggau Renaissance Kuala Lumpur Hotel.
Gelar ‘The ASEAN Green Hotel’ diadu dua taun sekali berserimbai enggau ASEAN Tourism Forum ke alai pengawa dipungkal ba taun 2008 di Thailand.
Brunei Darussalam ngatur pengawa ke sama ba taun 2012.
ASEAN Green Hotel Standard entara enam setindit ti udah ditetapka ASEAN Tourism Standard lalu lima setindit ke bukai iya nya servis spa, pemeresi jamban, program nyemilik, pemeresi kandang mengeri sereta pengelikun industri dagang temuai.
Bela datai Menteri Dagang Temuai Datuk Amar Abang Johari Tun Abang Openg, menteri dagang temuai menua ASEAN sereta orang bukai.