BINTULU: Rega sayur ba Bintulu deka pulai baka selama enda lama agi beduduk ari mua hari ngetu ujan sereta badu ampuh ba endur raban betanamka sayur, ku Kepala Opis Menteri Dagang Dalam Menua, Koperasi enggau Pekara Bebeli Barang (KPDNKK) Bintulu Mohamad Drahman.
Ku iya kenyau sebulan ti udah lalu, peranak menua tu udah ngasaika rega sayur bisi niki lalu mayuh sida sebana ke rega nya jauh mar ari rega ngelamatu.
“Rega sayur tu balat niki laban mayuh alai endur nanam sayur rusak ketegal ampuh bah lalu sekeda sayur ti bedau tinggal endang dijual enggau rega ti mar laban rega ba tikas borong mega bisi ditikika rega,” ku iya bejaku ba aum pemberita sepengudah ngelancharka ‘Operasi Ops 2’ ke diatur ba Farley Mini Market, ditu, pagi kemari.
Ku iya, Operasi Ops 2 tu tambung ari ‘Operasi Ops 1’ ti dipenyadi ba taun 2013 dipejalaika KPDNKK meresa sereta matau palan alai bejual enggau bebeli barang nyengkaum kedai renchit ba pelilih menua tu ngambika raban pedaja enda ngelanggar undang-undang ti nyual barang enggau rega ti mar lebih ari patut kelebih agi barang ti disekat rega.
Nya alai ku Mohamad, sida ari KPDNKK endang begunaka bantu ari raban pedaja ngambika enda nikika rega barang sekat ngelui ari rega ti udah ditetapka opis tu laban enti ditemu salah, sida tau ditinggang ukum enggau kompaun nitihka bagi penyalah ti dikereja sida.
Tang bepun ari diatu ku iya, barang sapa ke ditemu salah ngelanggar undang-undang tu deka dibai ngagai kot.
“Dulu suba, kami ari KPDNKK ulih netapka saman tauka kompaun ngagai sida (raban pedaja) ti ngelanggar atur bejualka barang, tang diatu, KPDNKK semina bejalaika atur penerit adat sereta matau ni bagi kedai ti nyual barang enggau rega ti enda patut lalu udah nya mai pekara tu ngagai kot,” ku Mohamad.
Reti iya, pemutus dikena nentuka tiap iku raban pedaja ti salah tu deka ditentuka kot lalu sepengudah nya baru sida nentuka penyampau kompaun enggau ukum bukai ti deka dilempai ba sida tu nitihka tikas penyalah ti dikereja sida.
Lebuh ba aum pemberita tu mega, iya ngarapka mensia mayuh ngeriput ngagai Opis KPDNKK enti sema bisi nemu ulah raban pedaja ti enggau sengaja niki ke rega barang ngambika pemesai opis (KPDNKK) ulih matau sereta mansik penyalah nya.