MIRI: Peranak ari rumah panjai di Sg Buri Bakong ensanus bisi besebana madahka pom peminta bantu tasah ketegal ampuh bah enda diterima, laban dianjung ngelui timpuh ti ditetapka.
Gasah Tedong, 48, ari Rh Ree Sg Buri Bakong madahka, iya niki ngagai Opis Betanam Betupi Bakong, nganjung pom peminta iya kena Hari Lima tu tadi, tang sida ba opis nya enda nerima pom iya.
“Ku sida ba opis nya, aku enggau kami serumah laun nganjung pom nya, tambah mega pom ari sekeda rumah panjai bukai udah dianjung sida ke Miri,” pia ku iya madah ngagai The Borneo Post ditu ensanus.
Ku Gasah, sida enda nemu haribulan ke penudi nganjung pom peminta nya, laban nadai ditulis ba dalam pom nya.
Ku iya, sida semina nemu pasal pom nya kena 15 Januari, sereta lalu berumban niki ngagai Opis Betanam Betupi Bakong, ngambi pom nya.
“Kami mega dipesan ngambika ngembuan gambar asal ti tau nyadika pengamat utai tanam baka padi, getah enggau sekeda utai tanam bukai rusak ketegal ampuh bah,” pia ku iya sereta madahka sida bisi nurun ke Miri nuchi gambar nya kena 16 Januari tu tadi.
Kena 17 Januari (Hari Lima) tu tadi ku Gasah, iya enggau sekeda bala sida serumah bisi niki ngagai Opis Betanam Betupi di Bakong nganjung pom peminta enggau gambar nya.
Taja pia, sida dipadahka timpuh ti ditetapka maya nganjung pom nya udah tutup.
Gasah ngarapka, opis ke bekaul mutarka penanggul sida ngambika pom peminta nya ulih diterima.
“Kandang menua kami mengkang sereta udah dituntung penusah ampuh bah dalam kandang sebulan tu,” ku iya.
Ku Gasah baru, paung getah iya mega rusak laban ampuh bah nya.