Anda di sini

Kerejasama Malaysia-China dikeandalka nyungkak program betanam betupi nengeri

Advertisement

KUCHING: Sapit Kepala Menteri Datuk Patinggi Tan Sri Alfred Jabu Numpang minta kerejasama entara Malaysia enggau China ulih mantu ngangkatka pengawa betanam betupi ngagai tikas ke tinggi agi.

Jabu ke mega Menteri Betanam Betupi Moden pechaya Sarawak ngembuan pengelebih teulihka pemujur ba industri betanam betupi ti udah nyaup ngemansang menua pesisir sereta mai penguntung ngagai peranak menua nya.

“Kitai ulih berundingka chara ngemansang pengawa betanam betupi di menua pesisir ngambika rayat ngasaika pengelantang,” ku iya maya ngarika Kepala Menteri Pehin Sri Abdul Taib Mahmud ba pengerami ngintu Taun Baru China Opis Kunsil Besai China di Kuching Liu Quan di Crown Square Malam ensanus.

Nengah kerejasama nya, Jabu netapka ukai semina industri betanam betupi deka teulihka penguntung tang atur nya mega deka mai penguntung ngagai industri dagang temuai kelebih agi ba maya Taun Nemuai ke Malaysia 2014.

Ku iya, raban ke ngaul diri ba industri baikka nya sida ari nengeri tu, Sabah tauka Semenanjung Malaysia patut begempung ngambika ulih matak mayuh agi peranak menua China nemuai.

“Kitai deka teulihka pemujur enti kitai bebendar ngereja pengawa. Aram meh kitai begempung ngambika taun tu mai berekat sereta mulaika pemaik ngagai peranak kededua menua, Malaysia enggau China.

Ngelaika 20 taun penumbuh Opis Kunsulat China ditu, Jabu meri jamin dia perintah nengeri deka nyukung pengawa ke dipejalai raban diplomat China kelebih agi ke bekaul enggau pekara main asal, pelajar enggau ke bukai.

Ngarika perintah nengeri Sarawak, aku meri jamin kaul manah ti udah dikembuan enggau menua China kenyau 40 taun ke udah deka majak tegap lalu nempa mayuh agi pemujur jemah, tandu iya.

Bela datai Menteri Opis Kandang Kunsil enggau Pemansang Raban Bansa Dato Sri Wong Soon Koh, Menteri Muda Penyambung Datuk Lee Kim Shin, MP Bandar Kuching Chong Chieng Jen, Temenggung Lu Kim Yong, Temenggung Vincent Lau enggau Ex-Sapit Menteri Pengangkut Datuk Yong Khoon Seng.

Advertisement