MARUDI: Urung 26 iku nembiak sekula Primari Lima enggau Primari Enam ari SK Gudang bisi nemuai sambil belajar ngagai dua buah opis perintah ditu.
Opis keterubah ke dilawa nya Balai Polis Marudi ke alai sida disambut Pemesai Polis, Mohd Ali, ke lalu nerang ngagai bala sida bekaul tanggungpengawa ke dipejalai sida raban polis ninting hari. Ba penemuai sida pagi nya mega bala nembiak dibai meda bagi senyata ke dikena polis bejalaika pengawa sida ngintu pengelikun mensia mayuh.
Raban sida ke diulu Kepala Pengajar Sarimah Hamid enggau enam iku raban pengajar mega enda tinggal bisi ngelawa Opis Bomba Marudi ba Kampung Cina semak ditu.
Penemuai sida mega disambut bala pemesai opis nya lalu diberi penerang bekaul enggau pengawa ke digaga sida besehari-sehari.