SIBU: Dipelabaka satu pertiga ari 359 iku Tuai Rumah (TR) di sitak Parlimen Sibu enggau Lanang bedau nerima surat chiri nyadi tuai rumah.
Bekaul enggau pekara nya, Chairman Gerempung Tuai Rumah Sibu (PTRS) TR Linus Meling ngarapka perintah meri surat chiri tuai rumah ngagai sida ti bekaul enggau naka penyampat, ti ulih ngenukuka status sida nyadi ketuai di sesebuah rumah panjai.
“Ari 139 tuai rumah ti nyadi kaban PTRS, enda kurang ari enam ari sida nya bedau nerima surat chiri nyadi tuai rumah,” ku iya madah ngagai Utusan Borneo pengudah nyadi chairman aum PTRS, kemari.
Sama datai baum Pemancha Stanley Geramong ti nyadi Sekretari PTRS, Penghulu James Semilan ti nyadi penyanding penemu sereta kaban komiti PTRS ke bukai.
Ku Linus, gerempung amat ngarapka perintah ulih mutarka isu nyiri tauka meri surat chiri ngagai tuai rumah ditu enggau jampat ke pemanah tuai rumah sereta peranak di rumah panjai ti bekaul.
“Gerempung amat ngarapka perintah ulih mutarka penanggul meri surat chiri ngagai tuai rumah ke bedau disahka servis sida enggau sepenyampat ke ulih,” ku iya seraya madahka bisi sekeda tuai rumah udah nganti pengelama nyauka manggai 10 taun.
Ditanya kebuah pekara nya nyadi, Linus madahka nya dipelabaka bepun ari rumah panjai nya enda chukup pemayuh pintu, iya nya kurang ari 20 pintu baka ti udah ditetapka perintah.
Nambahka nya mega iya ngarapka perintah ulih mutarka pengelaun mayar elawin tuai rumah, laban sekeda tuai rumah bedau nerima elawin sida berengkah bulan November taun nyin kemari.
“Bisi mega tuai rumah ti agi nerima elawin sepenyampau RM450 sebulan taja pan elawin baru tuai rumah iya nya sepenyampau RM800 sebulan,” ku Linus.
Ketegal laun mayar elawin ku iya, bisi meri penanggul ngagai tuai rumah ti bisi pekara diatur enggau macham opis tauka ijinsi perintah.
“Tambah mega tebal agi tuai rumah nadai kereja tetap ti nempa penatai pemisi sida,” ku iya seraya madahka enda nemu tegal elawin laun dibayar.
Linus mega minta tuai rumah ti bedau nyereta PTRS patut ngerejista diri enggau jampat, bayar yuran masuk nyadi kaban PTRS iya nya RM20 lalu yuran ninting taun iya nya RM12.
PTRS ku iya, deka ngatur aum ninting taun (AGM) di indu opis Parti Sa’ati Rayat Sarawak (SUPP) pampang Sibu kena 22 Februari tu ila, berengkah ari pukul 8.30 pagi.
Beduduk ari pekara nya, iya minta kaban PTRS ti bedau meri yuran ninting taun sida sebedau AGM dipejalaika ngambika ulih dipilih maya baum nya ila.