Anda di sini

Sempekat 10 Pekara mengkang dikeamat

Advertisement

KUCHING: Menteri ba Opis Menteri Besai (Pekara Undang-Undang) Nancy Shukery netapka status Sempekat 10 Pekara Sabah enggau Sarawak mengkang digenggam rapit lalu seruran dikeamatka nyentukka diatu .

Nyaut tanya pemberita kemari, Nancy madah bisi sekeda orang nuduh sempekat nya udah dileka  pengudah pengawa ngeluar bup berita The Herald diketuka di Kuala Lumpur.

“Isu ke nyadi di Kuala Lumpur enda ngeruga Sempekat 10 Pekara Sabah enggau Sarawak ke udah dipesetuju.

“Pekara  ‘Allah’ nya mega enda nyengkaum Sabah enggau Sarawak, semina nagang bup berita The Herald dikeluar lalu sempekat 10 pekara nya mengkang dikemeran di kededua nengeri tu,’ku iya ba siti aum pengarang berita kemari.

Berindik enggau nya, Nancy ngansak peranak Sabah enggau Sarawak ti diarika bemacham raban bansa sereta jalai pengarap ngenanka pemaik kaul ti udah lama dikemeran.

“Aram kitai peranak Sabah enggau Sarawak  nyadi chunto ti patut dititih peranak bukai di  Malaysia tu.

“Kitai patut diambi nyadi nengeri chunto ngagai nengeri bukai ke alai kaul entara tiap pupu bansa ke bemacham agama  seruran diintu manah ditu lalu isu agama ukai pekara ti tau diempelita ,”ku iya.

Ngenang senentang pengawa JAIS Selangor ti nangkap alkitab  bedau lama tu tadi, Nancy enggai bejurai panjai senentang isu nya.

Ba kaul bukai, Nancy mantah pengawa BERSIH ti nagang Kunsil Bepilih Besai  (SPR) bejalaika pengawa tauka pansik ngadu adan pengawa bepilih lalu nya udah ngelanggar atur demokrasi.

Ku iya, sigi udah nyadi polisi SPR mansik baru adan pengawa bepilih tiap lima taun lalu nya dipejalai nitihka undang-undang.

“Kelebih agi ba nengeri Sabah enggau Sarawak ti jauh besai ari nengeri bukai. Sigi patut kededua nengeri digaga adan baru ngambika atur penyambung mudah agi disedia.

“Enti BERSIH amat beresi, sida patut ngenukuka perambu ke manah ngambika bela nyaup SPR ngaga adan baru,”ku iya.

Advertisement