MIRI: Lebih 30 buah ruang bilik ke mit penatai pemisi palan berumah di Tudan ditu, udah nerima perengka berumah ke beungkus lebih RM50,000 ari perintah, dikena mantu sida ngemanahka rumah sereta nganti atap.
Bantu nya udah disuaka Menteri Muda Penyambung, Datuk Lee Kim Shin lebuh ke nemuai ngagai Tudan ensanus.
“Perengka berumah nya diberi nengah ungkup belanja ari perintah menua, kena mantu nyungkak tikas pengidup rayat kelebih agi raban ke bepenatai pemisi mit,” ku iya.
Lee ke mega Kaban Kunsil Nengeri Senadin, madahka semua ungkus nya ngelui RM50,000 nyengkaum pengawa ngemanahka rumah dua buah ruang bilik ke kurang benasit dia.
Rumah keterubah nya enggi seiku orang buta nama Mangai anak Amton, sebuah rumah agi enggi seiku orang tuai ke nama Chow Chin Chin, ti diau engguu seiku anak lelaki ke ngidap penyakit untak.
“Perintah endang seruran siru enggau rayat sereta mantu sida ngambi ulih ngasaika pengidup ke menyana agi,” ku iya.
Iya mega arapka rayat lantang ati enggau utai ke diberi perintah laban perintah endang dekaka rayat ngasaika pengelantang diau ba sebuah menua ke maju.
Lebuh ke nemuai ngagai endur nya ensanus, Lee mega bisi ngabas rumah Mangai engagu sida sebilik ti udah dikemanahka.
Nangkanka nya iya lalu ngabas rumah Chow Chin Chin ke udah repuk sereta nyauka runtuh.
“Buruk amat gamal rumah Chow Chin Chin tu. Pengawa ngemanahka rumah tu deka dipejalaika enggau lengkas laban sebagi ari perengka berumah tu udah bisi ditu. Kami arapka rumah nya ulih dikemanahka enggau naka penyampat,” ku iya.