Anda di sini

Putar lengkas kes bekaul NCR ke majak nambah

Advertisement

KUCHING: Hakim Besai Sabah enggau Sarawak Tan Sri Datuk Seri Panglima Richard Malanjun  madah penyampau kes ke bekaul enggau tanah adat bansa asal (NCR) ke majak nambah patut diputar enggau lengkas.

Ku iya, kot di kededua nengeri maya ke diatu napi pemar mutarka kes NCR ke alai sekeda nya merambu numbuhka kot tribunal tanah ngambika pekara tu ulih diputar enggau mudah.

“Tiap taun penyampau kes NCR majak nambah. Kitai ngelalu runding ari raban orang ke landik ba pekara undang-undang ngenuku sekeda perambu ke engkeman ngambika tau dikena mutarka kes NCR.

“Sekeda didinga merambu  numbuhka kot tribunal tanah tauka sebengkah kot ti semina ngadu pechara kes NCR,”ku iya maya bejaku ba pengawa Ngepun Taun Pekara Undang -Undang 2014 ke diatur di Bangunan Kot Lama ditu, pagi kemari.

Pengawa nya dipenyadi Menteri ba Opis Menteri Besai (Pekara Undang-Undang) Nancy Shukri.

Taja pia, Richard madah nadai meh guna numbuhka sebengkah kot ke bansa nya enti penyampau raban luya ti mutarka kes NCR mengkang kurang.

Berindik enggau nya, iya madah raban orang ke landik ba pekara tanah enggau adat ke bekaul  deka diasuh meri licha dalam taun tu.

“Penerang ke diberi ari raban nya ulih mantu kitai meretika kes NCR lalu dikerap ulih mantu mutarka sekeda kes,”ku iya.

Advertisement