SRI AMAN: Bala Dayak patut berubah chara berunding dalam semua sukut pengidup enti deka teulihka pemansang, pia ku Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis.
Ku iya, ba dunya moden diatu, raban Dayak patut sama singkang enggau bansa bukai ngambika sida ulih mantu ngemansangka menua Malaysia.
“Enti sema raban Dayak deka maju baka bansa bukai, sida patut berubah runding ari lama ngagai ke baru”, ku iya.
“ Dalam dunya moden diatu, kitai enda tau enda nguji masuk ba mayuh bengkah bidang sereta anang semina manggaika pengidup ba sebengkah bidang aja.
Iya ke mega Kaban Kunsil Nengeri (ADUN) Simanggang bejaku munyi tu lebuh bejadika Program Beripai, Chapel Saints Peter, Batu Lintang Undop ditu ensanus.
Ku iya, raban Dayak patut bechuntoka bansa China enggau Melayu ti udah maju dalam mayuh bengkah bidang kelebih agi ba pengawa dagang”, ku iya.
Harden mega ngelalau rayat ngambika ngembuan runding ti tebuka sereta nyukung polisi pemansang ke udah sereta deka dipejalaika perintah ngambika nengeri tu enda tinggal ari arus pemansang.
Ku iya, sukung penuh rayat ari mayuh bengkah parti komponen Barisan Nasional (BN) sereta rayat pupu raban bansa beguna amat kena nentuka pemansang ti diperambu nya mujur dipejalaika.
“ Perintah beguna amat ke sukung rayat di nengeri tu. Enti nadai kerejasama, sekeda program pemansang ke diperambu mar deka dipejalaika.
Ku iya, rayat aruh nemu milih ketuai ke endang amat ulih ngemansangka rayat, enda ngira ba nengeri tauka di menua pesisir.
“Diatu, rayat di nengeri udah nemu sereta dekaka pemansang belama. Nya alai, sukung ke diberi rayat ngagai ketuai perintah Barisan Nasional (BN) endang amat betul”, ku iya.
Sama bisi ngulu pengerami nya, Kaban Parlimen Sri Aman, Masir Kujat, Penghulu Micheal John Sanggop, bala ketuai raban bansa enggau bala ketuai opis perintah.