MERESA: Kuek berandau enggau Menijar Operasi, Terminal Bas Kuching Sentral, Stanley Ong (dua kiba) enggau seiku operator bas, seraya disempulang Marhainis (kiba) lebuh ti bejalai seraya meresa di terminal bas Kuching Sentral kemari.
KUCHING: Opis Pengangkut Darat (JPJ) Nengeri Sarawak ngarapka kompeni enggau deriba bas ekspres meri kerejasama ngemeratka tikas pengelikun, ngambika enda betapi enggau sebarang penusah bebadi ba jalai alun sepemanjai Ops Taun Baru China (TBC) berengkah ari 24 Januari ngagai 9 Februari 2014.
Ketuai Penulung Direktor, JPJ Nengeri Sarawak, Kuek Jui Hock madah, nya beduduk ari macham atur operasi ti deka dipejalaika nyerumba nya.
“Kami ngarapka nadai sebuah bas ekspres betapi enggau sebarang penusah di sepemanjai Jalai Pan Borneo kelebih agi maya Ops Taun Baru China, laban taun nyin kemari maya pengerami ke sama kitai nadai ngerikutka sebarang penusah bebadi bekaul enggau bas ekspres.
“Kebuah operasi diatur ninting bisi pengerami nyengkaum Ops Taun Baru China tu ukai ketegal deka ngiga penyalah orang tauka deriba, tang laban deka ngenuku sereta ngurangka penyampau penusah bebadi ba jalai alun di Sarawak.
“Maya Ops Taun Baru China tu raban kami deka ngaga seruyuk ba endur ke patut di sepemanjai Jalai Pan Borneo, kelimpah ari ngatur pengawa meresa enda ngira bansa perengka pengangkut.
“Kami minta semua kompeni ti beempu bas ngelalau deriba bas sida ngambika lebih bejimat, laban maya pengerami nya ila penyampau orang ti betengah tauka ngena jalai alun deka nambah,” ku iya.
Kuek mansutka pekara nya dalam aum pengarang berita ti diatur ba Bilik Baum Kuching Sentral ditu, pagi kemari.
Bejaku baru iya madah, berengkah 20 ngagai 23 Januari raban penerit adat JPJ deka bejalaika pengawa meresa tauka matau depo bas ekspres.
Ku iya, raban penerit adat JPJ mega deka bejalaika pengawa meresa sekalika meresa teknikal tauka ukai di terminal bas besai baka di Kuching, Sibu enggau Miri maya Ops nya dipejalaika.
“Nyerumba Ops Taun Baru China ti diatur seretai di serata menua Malaysia, raban penerit adat kami mega bisi nyaru nyadi orang tambang bas ekspres ti urung 50 iku, tu mega dikena ngurangka penusah bebadi enggau penyalah deriba bas.
“Sepemanjai Ops tu mega urung 150 iku raban penerit adat kami bejalaika pengawa di serata nengeri tu,” ku iya.
Ku Kuek, kelimpah ari nya JPJ mega deka ngatur Ops Khas Motosikal ti dipejalaika ninting hari.
“Kebuah kami bejalaika Ops Khas Motosikal laban penyampau orang ti bebadi ba jalai alun tebal agi sida ke bekenaka mutosikal.
“Kami ngarapka bisi kerejasama ari raban penerit adat bukai baka polis bejalaika operasi tu. Bisi empat hari ditimpuhka endur bejalaika operasi tu,” ku iya ti enggai madahka haribulan nya ke diatur seretai di serata Malaysia.
Berebak enggau tu Kuek mega ngarapka perengka pengangkut ti besai baka lori lebih likun, ngurangka pejalai tauka ngetuka pejalai maya pengerami Taun Baru China tu dikena nentuka pengelikun semua orang.
Penyampau semua perengka pengangkut ti diperesa maya Ops Taun Baru China Nengeri Sarawak ti diatur berengkah 3 ngagai 17 Februari 2013 iya nya 8,886 buah ti nyengkaum mutosikal ke bisi 2,946 buah; kerita (2,989); kerita persendirian (956); bas (990); perengka pengangkut ti mai barang kurang ari 5,000 KG (382); perengka pengangkut mai barang lebih 5,000 Kg (622) enggau perengka pengangkut bukai bisi sebuah.
Nambahka nya JPJ bisi ngeluarka saman ngagai 1,753 buah perengka pengangkut ti tebal agi ngagai sida ke bekena mutosikal iya bisi 740 saman, kerita (610); kerita persendirian (140); bas (24); perengka pengangkut ti mai barang kurang ari 5,000 KG (56); perengka pengangkut mai barang lebih 5,000 Kg (182) enggau perengka pengangkut bukai bisi seiti saman.
Opis Pengangkut Darat Nengeri Sarawak maya Ops Taun Baru China 2013 mega bisi ngukum 1,504 buah perengka pengangkut ti nyengkaum mutosikal iya bisi 614 buah, kerita (564); kerita persendirian (112); bas (16); perengka pengangkut ti mai barang kurang ari 5,000 KG (51); perengka pengangkut mai barang lebih 5,000 Kg (146) enggau perengka pengangkut bukai bisi sebuah.
Bisi dalam aum pengarang berita, Ketuai Penulung Pemesai Peneritadat, Ba Bagi Peneritadat, JPJ Nengeri Sarawak Marhainis Nasren sereta Pegawai Perhubungan Awam JPJ Nengeri Sarawak, Rogie Saui.