KUCHING: Atur ti diputus Opis Kunsil Sibu (SMC) nagang bekena polystyrene (pemungkus barang pemakai) tauka dikumbai styrofoam ba palan pemakai berengkah taun tu bela nerima sukung World Wide Fund for Nature-Malaysia (WWF-Malaysia).
Kepala Pengintu WWF-Malaysia di Sarawak, Dr Henry Chan madah, sida ngelalu pemutus SMC ti nyukung Local Agenda 21 ti ngemerat pemansang ke meruan.
“Kitai gaga Sibu udah ngambi inisiatif ke chukup manah, keterubah iya ba Sarawak ke alai pemutus tu ukai semina mulaika pemaik ngagai mensia mayuh tang mega nyaup ngintu pemaik rampa menua.
“WWF-Malaysia angkun bejalaika pengawa ngintu pemaik menua sereta pemansang ti meruan di menua tu nyengkaum Sarawak. Nagang ngena polystyrene nyadi sebengkah ari atur gerempung ngambi bagi ba pengawa ngintu pemanah kandang endur diau,”ku Dr Chan, bedau lama ke udah.
Ngarika WWF-Malaysia di Sarawak, iya ngarapka pemutus nya dititih opis kunsil bukai di nengeri tu.
Iya nambah, polystyrene tau disilih enggau keretas ke dikena baru, produk ‘biodegradable’ tauka mai kereban kena mungkus ke diri empu.
Ngenang senentang polystyrene, iya madah perengka plastik petroleum nya nya digaga ari styrene monomer. Sebengkah utai lempung ti dikena nyadika changkir ti tau ngenanka pengangat sereta penyelap kelimpah ti dikena mungkus perengka ti mudah pechah maya mindah lalu udah nyadi sebengkah perengka mungkus ti pemadu murah.
“Bekenaka polystyrene tau ngeruga pengerai mensia mayuh ketegal ti tau mansutka rachun (kimia) ba dalam pemakai kelebih agi enti utai diirup enggau pemakai nya agi angat.
“Polystyrene mega pedis sereta begunaka timpuh ti panjai enti kitai deka lela. Perengka nya mega tau ngeruga jelu siga bukai lalu suah ngamahka menua sereta ngalitka parit enti dibuai sengapa,”ku iya.
Iya nambah, asil pansik mandangka enti hidrokarbon ba polystyrene dipansut lalu bechampur enggau nitrogen oksida asil panchak mata panas deka ngadaka ‘tropospheric ozone’, sebengkah bansa angin ti tau ngeruga pengerai.