Anda di sini

Sekim Mini Estet Nanam Getah Ensebang Pelaie dikearap nguntungka 47 ruang bilik

Advertisement

Masir Kujat

SERIAN: Sekim Mini Estet Nanam Getah ari Opis Betanam Betupi Pelilih Mit Serian deka meri penguntung ngagai 47 ruang bilik ari Rumah Kalau, Ensebang Plaie.

Ku kaban Parlimen Sri Aman, Masir Kujat, projek ari Opis Betanam Betupi Pelilih Mit Serian nengah kerejasama Komiti Pemansang enggau Pengelikun Genturung Pendiau (JKKK) rumah panjai nya deka nguntungka urung 300 iku pekebun ari rumah panjai nya.

“Opis Betanam Betupi Serian enggau JKKK rumah panjai nya deka begempung ngemansangka tanah 47 pintu peranak rumah panjai nya ke mungkur pemesai 146 hektar, berengkah ari taun tu,” ku iya lebuh ti bejadika projek nya ba Genturung Pendiau Ensebang Plaie ditu, empai lama ke udah.

Ku iya,peranak rumah panjang nya deka ngasaika penguntung ari projek sekim nya dalam kandang beberapa taun ti ka datai.

Ku iya, mensia mayuh di menua pesisir anang muai peluang masuk ba sekim nya, laban nya meh sebagi ari chara perintah mantu rayat di menua pesisir nyungkak tikas pengidup sida.

“Anang sesekali ngumbai projek tu nadai meri penguntung ngagai rayat di menua pesisir, laban udah mayuh kandang menua di Sri Aman belabuh masuk projek tu,” ku iya.

Tandu iya, nengah projek nya, mandangka perintah nadai kala ninggalka pemansang rayat di menua pesisir ngambika sida bela ngasaika pemansang sebaka enggau ba nengeri.

Iya meransang peranak di rumah panjai tauka di genturung pendiau minta masuk sekim nya ari Opis Betanam Betupi Serian, Simunjan tauka Sri Aman.

“Aku minta rayat dalam sitak Parlimen aku ngambika sida anang malu betanya ngagai Opis Betanam Betupi ke semak enggau kita, senentang chara masuk sekim nya.

“Bala pemesai Opis Betanam Betupi sedia mantu sereta deka meri penerang ngagai orang ke deka masuk sekim tu,” ku iya.

Sama bisi ngulu pengerami nya, Pemesai Opis Betanam Betupi Serian, Tedwin Betie, Kaunsilor Tuai Rumah Peter Mornie, Tuai Rumah Sumbang enggau dua iku Pemantu Khas Masir, Abah Ugi enggau Edmund Pirang.

Advertisement