Anda di sini

RM4.5 juta dikena ngemansangka infrastruktur di Parlimen Sri Aman

Advertisement

SELAMAT DATAI: Masir (belakang) nyempulang Doris (dua kanan) maya datai ba pengerami nya.

Agih belanja ke besai nya mandangka perintah Barisan Nasional seruran ngemeratka tikas pendiau pengidup enggau pemansang rayat, ku Masir

SRI AMAN: Pemansang infrastruktur ba sitak Parlimen Sri Aman deka majak ngerembai sepengudah perintah Barisan Nasional (BN) ngemendarka agih belanja sepenyampau RM4.5 juta ba taun tu.

Kaban Parlimen nya Masir Kujat madah, agih belanja ke besai nya mandangka perintah BN semampai ngemeratka tikas pendiau pengidup enggau pemansang rayat.

“Kitai deka nguna agih nya dikena ngemanahka infrastruktur di menua tu lalu aku andal nya ulih nyungkakka tikas pendiau pengidup rayat,” ku iya ba Pengerami Makai Malam Krismas 2013 ke diatur Gerempung Tuai Raban Bansa Iban (PKMI) Pelilih Sri Aman ba Dewan Suarah Sri Aman.

Sapit Yang Dipertua Dewan Negara Senator Datuk Doris Sophia Brodie diberi basa bejadika pengerami nya.

Ba pengerami nya, Doris enggau Masir sama ngagihka RM5,000 ngagai PKMI Pelilih Sri Aman.

Kelimpah ari nya mega, Menteri Muda Pemansang Betanam Betupi Datuk Mong Dagang nengah wakil iya ngagihka RM4,000 ngagai gerempung ke sama.

Bekenangka pekara bekaul enggau pejalar, Masir madah, bala apai indai patut nemu iya nya pemujur anak dalam bidang akademik deka meri penguntung ngagai menua jemah ila.

Tu berindik ari perintah begunaka mudal mensia ti bisi kualiti tinggi kena ngerembaika atur pemansang menua ari sukut ekonomi, politik enggau sosial.

“Pemujur bala anak deka ngasuh apai indai nyengkaum pengajar sida gaga ati laban kitai semua deka meda anak nyadi orang ke nampung pejalai atur pemansang menua,” ku iya.

Sama bisi datai ba pengerami nya Chairman PKIM Pelilih Sri Aman Pemancha Samuel Lawen, Pemantu Masir Edmund Pirang enggau bala tuai raban bansa ngelingi menua Sri Aman.

Advertisement