Anda di sini

PVTMS ngarapka perintah mansik baru SVTB1M

Advertisement

NGARAPKA PERINTAH MENDING: Thomas (duduk kanan) enggau bala raban PVTMS ke bukai maya aum media di Sibu, kemari.

SIBU: Gerempung Veteran Soldadu Malaysia Nengeri Sarawak (PVTMS) ngarapka perintah nengah Jabatan Hal Ehwal Tentera ATM (JHEV) ulih mansik baru Pemeri Veteran ATM Enda Bepinchin 1Malaysia (SVTB1M).

Presiden gerempung tu Thomas Ling Kui Eng madah, bantu RM1,000 nya diberi ngena chara ‘one off’ taun seiti nyin tadi.

“Tang kitai melabaka enda kurang ari 2,000 iku ex-soldadu enda bepinchin serata nengeri tu empai nerima bantu nya.

“Kelimpah ari nya, urung 1,000 iku ex-soldadu ke udah ngaga peminta bantu SVTB1M empai nerima bantu nya nyentukka sehari tu.

“Nyangka perintah udah badu meri SVTB1M agi,” pia ku iya madah ngagai pengarang berita ba aum media ditu, kemari.

Beduduk ari pekara nya, mayuh ex-soldadu ke bedau nerima tauka bedau nganjung peminta mengkang ngandalka bantu nya diberi baru.

Dipadahka SVTB1M udah diketu kena 29 November 2013 enggau penyampau urung 5,000 iku ex-soldadu di Sarawak nerima bantu nya munyi ku jaku gerah Menteri Besai Datuk Seri Mohd Najib Tun Razak maya mantaika Bajet 2013 suba.

Tandu Ling, urung 8,000 iku ex-soldadu serata Malaysia mengkang empai nerima bantu nya ketegal macham pekara.

“Tu nyengkaum balu ex-soldadu ke udah lenyau bup penerang gawa (BAT.D), ex-soldadu ke udah diketuka gawa ketegal kes disiplin enggau raban enda bebayar ke enda gawa sepemanjai jam.

“Aku mega pechaya agi mayuh ex-soldadu enda bepinchin enggau balu sida empai minta SVTB1M ketegal suntuk belanja, umur ke udah tuai, sakit enggau penerang senentang bantu tu mengkang enda ditemu semua ex-soldadu,” ku iya.

Nambahka nya, ku iya, kenyau SVTB1M dibuka kena November 2012, PVTMS udah mantu lebih 2,000 iku ex-soldadu di Sarawak.

Kelimpah ari nya mega, PVTMS ngarapka ‘Jabatan Arah Rekod dan Pencen (JRP)’ ulih meri kerejasama ngemansutka salin penerang megai pengawa ngagai ex-soldadu ti nadai agi megai bup nya kelebih agi sida ke udah nganjung peminta.

“Gerempung kami ngasaika pekara tu bechiping laban sida udah kelalu lama ngarapkaka bantu tu,” pia ku iya sambil madah PVTMS deka semampai ngumpul penerang sida ke patut nerima bantu nya tang empai nerima bantu ketegal nadai ngembuan BAT.D.

Ba pekara bukai, PVTMS deka ngatur pengawa betemu enggau ex-soldadu bagi pelilih Lundu ba Balai Mensia Mayuh Pelilih Lundu kena 18 Januari tu, berengkah pukul 9 pagi.

Advertisement