Anda di sini

Harden turun padang ngenukuka kualiti infrastruktur dalam tikas ke manah

Advertisement

TURUN PADANG: Harden (mua) begulai enggau Sawing benung meresa pengawa ngemanahka jalai belakin ba menua Undop, Batu Lintang, Sri Aman, bedau lama ke udah.

SRI AMAN: Menteri Muda Pemansang Menua Pesisir Datuk Francis Harden Hollis turun padang ngenukuka kualiti enggau tikas pengelantang infrastruktur enggau penyambung ba menua Undop, Batu Lintang ba tikas ke manah.

Ku iya, kitai semua deka meda semua infrastruktur enggau penyambung ke digaga perintah Barisan Nasional (BN) mai penguntung ke panjai ngagai peranak menua nya.

“Beduduk ari tu meh aku turun padang kena ngenukuka sebarang projek  infrastruktur enggau penyambung ke bepenanggul dikemanahka baru jemah,” ku iya madah ngagai pemberita ditu, bedau lama ke udah.

Harden muai awak sepengelama tiga jam matau menua Undop seraya disempulang Kunsilor Sawing Sumar enggau wakil Pemuda SUPP Simanggang Patrick Michael Malajin.

Harden ke mega Kaban Kunsil Nengeri (ADUN) Simanggang bisi matau proses ngemanah sereta ngaga baru jalai belakin ba menua Undop, Sri Aman.

Berindik ari nya, iya ngarapka piak ke bekaul ulih bejalaika pengawa ngemanahka jalai kelebih agi jalai nuju ngagai menua pesisir ngambika kualiti jalai manah agi sereta ulih mai pengelantang ngagai peranak ke diau ba menua Undop, Batu Lintang.

“Aku arapka rayat Sri Aman ke diau ba menua pesisir ngenataika sebarang penanggul ba menua kita empu nengah piak ke bekaul ngambika ulih diputarka.

“Anang guna piak penyakal laban pengawa ke baka nya semina nguntungka politik ngagai parti penyakal ke enda ulih mai sebarang pemansang ngagai rayat,” ku iya.

Advertisement