KAMI ENDA BEGILIK PENEMU: Raban ketuai GBKJIM mandangka ‘Bup Kudus’ ngagai pemberita pengudah ngeluarka penerang pasal nguna leka jaku ‘Allah Taala’ dalam Al-Kitab ke dikena raban Keristin bansa Iban ditu, empai lama ke udah.
Kenyau beratus taun leka jaku nya udah dikena ngangau Tuhan dalam sembiang ngena jaku Iban
KUCHING: Penyerekang penemu entara raban Islam enggau Keristin di Malaysia majak nyadi ketegal leka jaku ‘Allah’. Berindik ari nya, Gempuru Besai Keristin Jaku Iban Malaysia (GBKJIM) mantaika pengaga ati ngagai semua orang ti mandangka sukung enggau penyerakup lebuh maya penyarut tu.
Chairman GBKJIM, Pastor Greman Ujang Slat meri terima kasih ngagai seiku aktivis pengawa rama, Datin Paduka Marina Mahathir ke udah ngulu ‘Our Lady of Lourdes Church’ di Klang, Selangor kena Hari Minggu nyin tadi disempulang bala kaban ari gerempung ukai dikuasa perintah (NGO) ‘Sisters in Islam’ (SIS), mandangka penyerakup enggau raban Keristin.
“Kami meri terima kasih ngagai Tuhan laban bisi seiku orang ke enda bechiping ati ari raban Islam, baka anak indu Menteri Besai menua Malaysia ke suba (Tun Dr Mahathir Mohamad), iya nya Datin Paduka Marina enggau bala pangan iya bukai laban ke udah berani bediri begulai enggau anak kitai ngeringka batang pengarap kitai di gerija,” ku iya nengah penerang media ke dipansutka iya.
“Ati enggau semua leka sembiang kami ditujuka kami ngagai Reverend Father Lawrence Andrew, ke alai semua raban Keristin nyengkaum paderi enggau pastor deka bediri tegap enggau iya, sereta milih nitihka Tuhan ari mensia, ba maya baka ke diatu.”
Ku Greman, GBKJIM ke digulu urung 6,000 iku mensia, besembiang dalam Jaku Iban di serata menua Sarawak, berasai asa sereta enda lantang ati enggau ulah Opis Pengarap Islam Selangor (Jais) ke ngeruga Opis Gerempung Bup Kudus Malaysia (MBS) sereta ngerampas lebih 300 iti Bup Kudus dalam Jaku Melayu enggau Jaku Iban apin lama ke udah.
“Ulah Jais nya nampak bendar ngelaban sempekat ke bisi dalam 10-Point Federal Cabinet Agreement and the country’s Constitutional Guarantee of Religious Freedom. Nya mega mandangka jaku tuku Menteri Besai bekaul pemutus Kot Apil kena 14 Oktober, 2013, ke deka dipejalaika iya ba raban Keristin di menua timur Malaysia enda ngasi agi,” ku iya.
Gerempung Bup Kudus Malaysia (MBS) endang bisi kuasa ngimport sereta nyelak ‘Alkitab Berita Baik’ (Bup Kudus Dalam Jaku Melayu) enggau ‘Bup Kudus’ (Dalam Jaku Iban), semina gerempung nya aja meh ke ngemansutka Bup Kudus ngagai komuniti di Sarawak, ke tebal agi besembiang ngena Jaku Melayu enggau Iban.
“MBS tu beguna amat ngagai Jaku Iban ke dikena dalam gerija di Sarawak, nya alai kami irauka JAIS udah bepekat enggau raban bekuasa ngerampas Bup Kudus ti besai amat reti ba raban Keristin Bumiputra di Sarawak.
“Pengawa ngerampas ‘Alkitab’ enggau ‘Bup Kudus’ kami nya ukai pekara ke mit, ngelanggar atur sereta enda bebasaka batang pengarap enggau pengawa kami ti ngerembaika jalai pengarap,” ku Greman, seraya madah, pengawa nasat presiden enggau menijer MBS, Lee Min Choon seduai Sinclair Wong, amat ngemediska ati.
Iya mega enda arapka penerang ti madahka Bup Kudus ke dirampas nya deka dipulaika baru.
“Enti semina seiti aja ke diambi, kami pechaya sida semina deka meresa Bup Kudus nya. Tang ulah ti ngerampas beratus iti Bup Kudus nya, nampak endar deka nagang raban Keristin ngena jaku Iban dalam Bup Kudus.
“Ulah ke nadai pemendar sereta ngaga atur kediri nya, tampak endar dipeda deka nagang bansa Iban bejalaika pengawa ba pengarap sereta ngerembaika pengarap Keristin dalam komuniti,” ku iya.
Greman mega madah, komuniti Keristin Iban nemu Menteri Besai Datuk Seri Najib Tun Razak, ke nyain sempekat 10 pekara nya nadai bemunyi senentang ulah ke ngelanggar hak Keristin bansa Iban, ba jalai pengarap.
“Kami minta Kabinet ba perintah besai, enggau naka pengelengkas minta Bup Kudus nya diserahka pulai baru, lalu minta sebarang kereban raban ke dikena ngajar raban Keristin enggau Bup Kudus Iban enda dikachau sebarang ejensi di menua tu.
“Tu meh pekara ke udah disemayaka enggau aki ini kami maya ke nerima kami masuk gempung Malaysia kelia,” ku iya.
Kelimpah ari penyerekang penemu ke nyadi diatu, Greman mega madah, GBKJIM tetap ngagauka Tuhan nya enggau nama ‘Allah Taala’.
“Kami tetap ngagauka Tuhan ke ngaga dunya enggau serega sereta semua utai di dunya tu enggau nama ‘Allah Taala’ laban kami udah ngena nama nya beratus taun, laban nadai nama bukai ke dikena raban Keristin Iban nyilih nama Tuhan nya dalam Bup Kudus.”