NGELUPAK: Sekeda ari kerubung kekura ke dipeda ngelupak ke diambi Vincent mimpi senentang pekayan indai iya ke charik bechura chelum.
KUCHING: Seiku lelaki beumur 50-an ari Taman Riveria, Kota Samarahan, ensugau dani kena Hari Tiga minggu nyin tadi ketegal ngiga kekura ke diengkah ba mua pintu belakang berindik ari mimpi nyelai senentang niang indai iya.
Lelaki nya semina deka dikelala enggau nama Vincent, madah sebedau iya tedani ari mimpi iya bisi ninga bunyi pintu belakang ditengkuk orang.
Lebuh muka pintu dia iya tepedaka niang indai iya ke udah parai lebih 10 taun ke udah,” ku iya madah ngagai The Borneo Post.
Indu nya dipeda iya betubuh kurus seraya ngena pekayan charik bechura chelum.
Indu nya mega dipeda iya baka ke lapar lalu iya ngembuan juluk ati deka mai indu nya pulai ke rumah, tang iya lalu tedani ari tinduk ketegal tedinga bunyi salak uduk orang sepiak rumah.
Iya enda ulih ngelelapka mata lebuh meda kekura nya.
Vincent madah, utai ti bangat ngalitka ati iya nya kerubung chelum kekura nya udah ngelupak, ngingatka iya pekayan charik chura chelum ke dikena indai iya ke diambi dalam mimpi.
“Aku sigi enda pechaya ke semua mimpi tu tang utai ke nyadi sigi sebaka enggau cherita ke diambi aku dalam mimpi,” ku iya.
Vincent udah ngaga pemutus ati nginang kekura nya sereta besemaya ngaga sebuah pegung mit ngambika bisi endur kekura nya diau.
“Mayuh orang ngasuh aku meli lumur tikit 4D pengudah kes nya nyadi, tang aku semina deka ngaga pengawa nya (meli lumur 4D) enti aku bisi ‘diasuh’ meli lumur 4D,” ku iya seraya madah kekura nya rindu makai pisang.
Vincent pechaya kekura nya mega tau datai ke pantai laban datai ari sungai di dalam paya ke besemak rumah iya ketegal ujan lebat enggau ai pasang.