NGEMERATKA PEMANAH PENGAWA: Dr. Penguang (empat ari kanan) enggau Muzaimah ngetas tali gelembung dikena ngelai bejadika atur pengawa nya ditu, kemari.
SERIAN: Diskaun penyampau 50 peratus diatu diberi ngagai ukum tauka chaj laun mayar chukai pintu di serata nengeri tu.
Nitih penerang ari Sekretari Mendam Opis Menteri Kandang Menua enggau Pemansang Raban Bansa, Datu Dr. Penguang Manggil, timpuh diskaun nya dipejalaika pengelama lima bulan iya nya nyentuk ngagai 31 Mei.
Ku iya nandu, nya ulih dibayar sekali tauka dibayar bererenggat.
“Chara mayar sereta timpuh ti panjai nya meri peluang ngagai orang mayuh ti kurang penatai pemisi mayar utang chukai pintu ke bedau dibayar,” ku iya.
Iya bejaku munyi tu lebuh bejadika Kempen Senyum Majlis Daerah Serian (MDS), ditu kemari.
Sama bisi datai Pemangku Sekretari MDS Muzaimah Sumar.
Kelimpah ari nya, Muzaimah madah, Kempen Senyum MDS sebengkah program ti madah ngagai mensia mayuh sereta raban bansa di Serian pasal ngemanahka agi sistem servis kaunter kaunsil iya nya sistem idar bepelasarka mesin ti meri servis ngagai mensia mayuh ngatur pengawa.
“Pengawa ngemanahka tu dikena ngangkatka agi kualiti servis kaunsil nya (MDS).
“Ti dikearapka kami iya nya teulihka baru ‘Anugerah Kaunter Terbaik Peringkat Pihak Berkuasa Tempatan taun 2010’,” ku iya.
Nyerumba kimpin nya, MDS mega bejadika tujuh brusor penerang ti nyengkaum Bahagian Kewangan iya nya Kaunter Perkhidmatan Pelanggan, Bahagian Kesihatan Awam Persekitaran, Bahagian Kerja Awam, Bahagian Pentadbiran, Bahagian Penilaian, Bahagian Penguatkuasaan enggau Bahagian Perpustakaan.
Brosur nya meri penerang pasal atur pengawa sereta servis ti bisi disediaka dikena nempa pengibuh enggau meri penemu ngagai orang mayuh pasal servis MDS.