Anda di sini

ATF dikearap ulih ngelakuka dagang temuai ASEAN di serata dunya

Advertisement

PAKEJ BARU: Abang Johari (empat kanan) dalam aum pengarang berita meri penerang pasal ATF 2014 seraya disempulang Menteri Muda Dagang Temuai Datuk Gramong Juna (empat kiba), Undersecretary Strategic Planning & International Affair Division Christina Tharsis (tiga kanan) sereta Sekretari Mendam Opis Menteri Dagang Temuai Datu Ik Pahon (dua kanan). — Gambar Kong Jun Liung

KUCHING: Forum Dagang Temuai ASEAN (ATF) 2014 ti berengkah seharitu (16 Januari) ngagai 23 Januari tu deka dipenyadika Menteri Besai Datuk Seri Najib Tun Razak kena 20 Januari di Kunsil Nengeri (DUN).

Menteri Dagang Temuai, Datuk Amar Abang Johari Tun Openg madahka, ATF sebengkah kerejasama menua ASEAN kena ngangkatka ASEAN nyadi sebengkah destinasi tauka palan dagang temuai dikelala serata dunya.

Iya madahka pengawa nya diatur sekali setaun lalu besilih endur ngatur entara 10 bengkah menua ASEAN lalu taun tu Malaysia dipilih nyadi tuai rumah ti bepalan ba Kuching, Sarawak.

“Forum Dagang Temuai ASEAN (ATF) 2014 ti diatur di Kunsil Nengeri Kuching deka dipenyadika Menteri Besai (Datuk Seri Najib Tun Razak).

“Tuju ATF diatur, dikena ngelakuka ASEAN nyadi sebengkah palan sereta menua ti mayuh macham pekara ti tau narit ati temuai kelimpah ari ke ngasuh mensia mayuh nemu pasal ASEAN nyadi sebengkah palan dagang temuai ba rantau Asia Pasifik.

“Nambahka nya (ATF) dikena ngelakuka pengawa dagang temuai dalam menua ASEAN sereta ngenegapka agi pengawa begulai entara industri dagang temuai ASEAN,” ku iya dalam aum pengarang berita ATF 2014 ti diatur ba opis iya Bagunan Baitul Makmur ditu kemari seraya madah senipak enggau Taun Nemuai Sarawak.

Abang Johari ti mega Menteri Pengawa Berumah madahka ATF keterubah pengerami dagang temuai antarabansa diatur nyerumba Taun Nemuai Ke Malaysia.

Berebak enggau tu iya ngarapka pengemeran dagang temuai di nengeri tu ngambi awak ngelakuka produk dagang temuai ngagai temuai ari menua luar lebih sida pemeli enggau penyual ke bisi datai nyerumba ATF 2014, ti nyemaka sereta ngenukuka dagang.

“Kitai mesti nemu sida datai kitu laban sida deka nemu sereta meda produk baru, pakej baru enggau ke bukai.

“Aku ngarapka sida deka meda nama dikemisi sereta disediaka kitai di Malaysia lebih agi di Sarawak laban palan ATF diatur di Kuching sereta aku ngarapka peranak menua kitai ngambi peluang betemu pemeli ari menua tasik,” ku iya.

Nitih penerang ari Abang Johari, sepengelama lapan hari berunggu ATF 2014 diatur, dipelaba urung 2,000 iku temuai ari menua tasik serata dunya bisi di Kuching.

Bisi 240 iku pengari datai ngagai ATF 2014 ti nyengkaum bala menteri dagang temuai ari 10 bengkah menua ASEAN, ketuai National Tourism Organization (10), commissioners (Singpura, Indonesia), senior tourism official enggau ASEAN Secretariat (100) sereta bala ASEAN Dialogue partners (ari menua China, Republic of Korea, Jepun, India enggau Rusia.

Kelimpah ari nya bisi 879 pengari penyual (dagang temuai) sereta bisi 462 ari 54 buah menua serata dunya datai ngagai Travex ti diatur ba BCCK nyerumba ATF tu.

Dipelabaka bisi 184 pengarang berita antarabansa enggau peranak menua tu bisi ngulu licha ti diatur kena 22 Januari di BCCK.

Perintah nengeri ngarap bendar pemujur ATF tauka sektor dagang temuai nyungkakka ekonomi menua enggau nengeri sereta ngarapka sektor peribit diperansang ngambi peluang ngelakuka Sarawak.

Menua Mynmar udah dipilih nyadi tuai rumah ATF taun 2015.

Advertisement