Anda di sini

Anang ngasuh koperasi luar nganjung barang sabsidi

Advertisement

KSKB arapka KPDNKK ngenukuka nadai orang luar dipadu nganjung barang sabsidi ngagai menua pesisir

SIBU: Koperasi Song Kapit Berhad (KSKB) minta Opis Menteri Pengawa Dagang Dalam Nengeri, Gerempung Kerejasama enggau Pekara Bebeli Barang (KPDNKK) enda nejuka orang luar megai pengawa nganjung barang sabsidi ngagai menua pesisir.

Chairman KSKB Penghulu Baleng Jengen madah, gerempung kerejasama tauka koperasi menua nya empu bisi kebuah ke engkeman ba semua pekara baka ba pekara perengka pengangkut.

“Tu kelebih agi bekaul enggau peminta mensia mayuh. Ketegal endang peranak asal ari menua tu empu, kami lebih agi nemu nama utai dikedekaka rayat.

“KSKB mega udah bisi kaul ti manah enggau 13 iti Pos Bejual (POS) di Nanga Bangkit, Nanga Engkuah enggau Lubok Ipoh lalu pekara tu nyangka enda muntang dikereja orang baru datai,” pia ku iya maya berandau enggau pengarang berita ditu, kemari.

Bela nyempulang iya maya tu iya nya Sekretari KSKB Catherine Nain Abet enggau Tukang Wang KSKB James Minggu Serang.

KSKB udah dichiri KPDNKK mai barang sabsidi baka Gas Petroleum Cecair (LPG), gula, tepung, minyak makai, beras enggau petrol ke dikena 22 buah rumah panjai di Ulu Katibas berengkah ari 2009 nyentukka 2013.

Baleng madah, laban ke endang peranak asal menua nya empu, servis sida ukai semina ngira untung aja tang meri servis ngagai rayat.

Ba pekara tu, Baleng madahka kelimpah mantu deka ngelempungka belanja mensia mayuh, sida mega mantu perintah meri servis ngagai rayat.

Ku iya, penanggul tau nyadi enti orang ari menua bukai dipadu megai pengawa nya.

“Tu tau nejuka pengawa mekal barang tau bepenanggul.

“Kediatu kitai enda randaka servis ari orang luar lalu kitai udah mujur megai pengawa tu kenyau ari taun 2009,” ku iya.

Advertisement