Datuk Amar Abang Johari Tun Openg
KUCHING: Bepelasarka peneleba enggau penyulut ti udah dijapai ba taun 2013, perintah Sarawak arap bendar nengeri tu diberi awak ngatur pengerami besai, baka Asean International Film Festival and Awards (AIFFA), genap dua taun sekali.
Menteri Dagang Temuai, Datuk Amar Abang Johari Tun Openg madah, pekara tauka perambu nya udah dikenataika ngagai Opis Menteri Dagang Temuai enggau Main Asal.
“Taun nyin kemari (2013) kitai udah nyadi palan endur ngatur AIFFA, nya alai kitai merambu ngagai Menteri Dagang Temuai enggau Main Asal ngambika ngena ASEAN (Malaysia nyadi palan endur ngatur AIFFA) ba negeri Sarawak genap dua taun.
“Diatu kitai benung minta pemendar, udah nya perintah Sarawak deka ngatur nya (AIFFA) enggau sukung perintah besai,” ku iya.
Abang Johari ti mega Menteri Pengawa Berumah mansutka pekara nya dalam aum pengarang berita Forum Dagang Temuai ASEAN (ATF) 2014 ti diatur ba opis iya di Bangunan Baitul Makmur ditu kemari.
Bejaku baru iya madah, pekara tauka perambu nya deka dikerandau dalam ATF 2014.
Kelimpah ari nya, lebuh ditanya bekaul enggau MICE (Meeting, Incentive, Conference, Exhibition) iya madahka Malaysia sereta Sarawak empu mayuh udah ngatur MICE sekalika besai tauka mit.
Ku iya, Sarawak tauka Malaysia ulih dikelakuka nyadi palan MICE beduduk ari pemanah perengkaguna tauka infrastruktur ti dikembuan menua.
“Sebengkah agi pengelebih kitai ke patut dikelaku tauka dikerembaika kitai iya nya nyadi palan MICE.
“(Ambika banding) mayuh aum besai diatur di Palan Aum Borneo Kuching (BCCK), tu sebagi ari produk (chara) dikena narit mayuh agi aum besai diatur di Malaysia lkeebih agi di Kuching.
“Ba taun 2013 ba Sarawak, kitai bisi udah ngatur 57 aum besai renggat antarabansa ti bisi urung 21,277 iku pengari, lalu penyampau penatai pemisi ke diulih ari pengari ke datai ngagai aum besai iya nya urung RM42 miliun,” ku iya seraya madah kelimpah ba BCCK aum besai mega bisi diatur ba hotel.
Bisi ngulu aum pengarang berita nya kemari, Menteri Muda Dagang Temuai Datuk Gramong Juna, Sekretari Mendam Opis Menteri Dagang Temuai Datu Ik Pahon sereta ke bukai.