SIBU: Kaban Kunsil Nengeri (ADUN) Dudong Yap Hoi Liong madahka diri enda enggau bediri maya Pengawa Bepilih Nengeri (PRN) ti deka datai.
Maya berandau enggau pengarang berita kilah ensana, iya enda nyalam deka ngemeratka pengawa nyadi luyar kelimpah ari ruang bilik diri empu.
Ku iya, udah chukup alai iya nyadi pengari rayat ba pengelama sepengggal lalu udah maya alai raban ti profesyenal ari Parti Tindakan Demokratik (DAP) nganti penuduk nya.
“Ari keterubah aku madahka diri semina deka nyadi pengari rayat ba pengelama sepenggal aja sebedau ngelengkaka pengawa tu ngagai sida ke biak agi.
“Tang aku enda kala nusi pekara tu ngagai orang bukai kelimpah bini aku empu aja,” pia ku iya madah.
Yap madahka pemutus nya ukai bisi kaul enggau DAP tang enda pemutus ari iya empu.
“Aku mantaika penerang tu ngambika nadai spekulasi entara pemesai DAP di Sarawak nyadi.
“Nadai kaul enggau pemesai parti. Aku mengkang bisi kaul ke manah enggai sida lalu kami endang ngembuan ulah bekerejasama enggau pangan diri ngeringka tuju politik,” ku iya madahka baru.
Ku iya, iya udah mantaika pekara nya maya ngulu aum entara pemesai DAP Sarawak di Sibu malam hari Minggu tu tadi.
Ba aum nya, Chairman DAP Sarawak Chong Chieng Jen mega bisi datai.
“Diatu aku deka madah ngagai semua lebih agi ngagai rayat pegai DUN Dudong, aku badu agi bediri maya PRN ti deka datai,” ku iya nandu baru jaku iya.
Iya mega madahka pengawa nyadi ADUN Dudong seiti awak ke diberi DAP ngagai iya.
Taja iya nadai ati deka ngetanka penuduk nya, tang iya mengkang deka gawa ke rayat enggau DAP seagi timpuh sepenggal empai tembu.
“Aku baka selama meri sukung enggau servis ke pemadu manah ngagai rayat enggau DAP,” ku iya madahka baru.
Yap dipadu nyadi DUN Dudong kena 16 April 2011 maya PRN alai maya nya penuduk tu diperubutka tiga iku chalun.
Yap menang enggau majoriti 317 undi.
Iya bulih 9,649 iti undi, Datuk Tiong Thai King (BN) 9,332 iti undi enggau chalun ngatika diri Apandi Abdul Rani, 174 iti undi.