KUCHING: Sebuah agi palan makai ditu udah ditutup Unit Pengelikun enggau Kualiti Pemakai, Opis Pengerai Pelilih Menua Kuching kena 10 Januari tu tadi, laban ditemu kamah ngembuan sarang chit.
Palan makai di Jalai Rubber ti ditutup nya, ketiga udah dua buah palan makai bukai di Kota Sentosa enggau King Centre di tutup kena 6 enggau 9 Januari tu tadi.
Taja pia, Ketuai Penulung Opis Pengerai sitak Kuching, Sabri Sahari madah, palan ke baru tutup nya udah dibuka baru kena 13 Januari tu tadi, laban udah meresi palan makai nya.
“Urung 85 buah palan makai bisi diperesa lalu tiga ari nya diasuh tutup kelimpah ari kompaun mega diberi ngagai sida.
“Pengawa meresa baka tu deka terus digagapejalai kami baka selama,” ku iya madah lebuh dikerandau ditu, kemari.
Kelimpah ari nya, Sabri madah operasyen baka tu deka diatur enti bisi kompelin ari mensia mayuh ke makai ba kedai nya.
“Udah tu ila, kami deka meresa enti ditemu, mensia mayuh bisi kompelin pasal kedai makai ditemu sida iya kamah.
“Tu laban kami mayuh udah nerima kompelin lalu kompelin nya majak nambah lebuh pengawa meresa kedai makai tu digaga kami bedau lama tu tadi,” ku iya.