Dikena ngenukuka nya, kerejasama mensia mayuh enggau polis patut dikenegapka agi: Abang Johari
KUCHING: Pengelikun sereta pengelantang pendiau peranak mengeri Kuching deka seruran dikemerat.
Menteri Dagang Temuai, Datuk Amar Abang Johari Tun Openg madah, kerejasama mensia mayuh di Bandaraya Kuching enggau polis sigi dikemerat.
“Kami minta mensia mayuh lebih agi di Bandaraya Kuching meri kerejasama ngagai raban pengelikun, baka polis ngambika pengelikun temuai ke nemuai ngagai menua tu seruran dikemerat,” ku iya.
Iya madah baka tu lebuh dikerandau sepengudah bejadika Gempuru enggau pengawa Bebaris nyerumba pengerami nyambut Maulidur Rasul di luar Surau Bandarsah, Jalai Datuk Ajibah Abol ditu, pagi kemari.
Iya madah bansa nya lebuh nimbal siti kes orang ke deka ngerumpak sebuah kerita Hilux ke nyadi di sitak Satok, kena hari Satu tu tadi, alai seiku saspek ke besenyata ngelarika diri lalu seiku agi kena tangkap mensia mayuh enggau polis ti bisi dia maya nya.
“Kitai sigi enda ulih nyeliah kes bansa tu, taja pan enda mayuh nyadi di nengeri tu tang ke diatu pekara pengelikun kitai agi manah.
“Iya kes ke jarang nyadi, lalu dalam pekara tu, kami minta mensia mayuh lebih agi sida ke diau di mengeri tu meri kerejasama enggau raban pengelikun.
“Lalu pia mega enti ulih, enda ibuh media ngemesaika cherita baka tu. Aku minta mensia mayuh ke diau di mengeri tu beratika utai ngelingi kita, laban aku pan tusah ati meda lampu-lampu ke dipasang kitai nyau enda bekabel agi laban kena churi, nya alai kitai nyau ngena lampu ke nyimat kuasa (LED),” ku iya.
Iya nambah, pekara baka tu enda patut nyadi lebih agi Bandaraya Kuching minggu baru tu ila, deka nyambut pemayuh temuai ke bisi baum besai ba Palan Aum Besai Borneo Kuching (BCCK), iya nya ‘ASEAN Tourism Forum’ (ATF).
Kelimpah ari nya mega, Abang Johari madah, di sitak Satok di tengah-tengah Bandaraya Kuching, udah bisi ngerintai sekeda program dagang temuai ti digaga Pemuda PBB Satok, lalu entara nya aktiviti bebasikal ke deka dipasuk urung 1,000 penyerta di sitak tu nyengkaum di sitak Bandaraya ke deka digaga dalam bulan Februari tu ila.
Program dagang temuai nya mega nyengkaum aktiviti nginti di tebing sungai enggau pekit lumba enggau main ke digaga pampang Lumba enggau Main PBB.
Abang Johari mega madah maya Pesta Satok (Bulan Ogos) nya ila, sida iya mega bisi mai penyereta gerempung dagang temuai ari Melaka, alai bedau lama tu tadi, opis menteri nya bisi nemuai ngagai Melaka lalu meda gaya palan dagang temuai di sitak nya dipejalaika.
Sama bisi ngulu atur program nya kemari, Menteri Kereja Raya Malaysia, Datuk Fadillah Yusuf enggau Datuk Bandar Opis Kaunsil Bandaraya Kuching Selatan, Datuk Abang Abdul Wahap Abang Julai.