Anda di sini

Pejalai Nyuak majak dikerinduka mensia mayuh

Advertisement

PENGGI NUAN: Kristoffer (kanan) nyuaka bantu ngagai Lily Duren seraya dikemataka Tr. Seking, Penghulu Esit, Tr. Madang, Penghulu Geruna sereta sida ke bukai.

KAPIT: Kaban Kaunsil Besai Parti Rakyat Sarawak (PRS), Datuk Kristoffer Nyuak Bajok madahka diri berasai gaga endar ati meda sambut ke manah ari  mensia mayuh ba kandang Pelilih Mit Merit (Merit, Metah enggau Pila) lebuh iya nemuai ngagai Rumah Seking, Nanga Merit kena Hari Enam minggu nyin tadi. Rumah Seking nya rumah panjai bansa Beketan ba Nanga Merit.

Penatai Kristoffer enggau raban iya dikelaluka nengah chara adat asal bansa Beketan enggau Iban ti betuaika Pengulu Esit Nalo, Pengulu Geruna Mawan enggau Tr. Seking.

“Aku berasai gaga endar ati meda sambut ke manah amat ari raban bansa ba kandang menua Merit, ke alai pengerami malam nya digulu lebih 300 iku mensia.” ku Kristoffer lebuh berandau enggau pengarang berita ari The Borneo Post pagi kemari.

Ku Kristoffer, bansa Iban enggau Beketan ba kandang menua nya mega sebaka enggau ba kandang menua bukai ke udah endur aku nemuai, ke alai langgur penemu sida deka didinga ketuai parti.

“Sebarang endur alai aku nemuai, nembiak redak endang mandangka sukung ngagai aku lalu arapka aku nyadi chalun ke ulih ngerampas sitak Pelagus ari penyakal ba pengawa bepilih dudi tu ila,” ku iya.

Berebak enggau pengerami nya, Kristoffer ke mega seiku orang dagang udah nyuaka pemeri ari iya empu ngagai peranak Rumah Seking sereta nyuaka pemeri ngagai Pn Lily Duren, balu niang Tujok Lah ke parai ba penusah Ekpress Kawan Mas ke karam ba Wong Tukok, Bungan semak Belaga kena 28 Mei taun siti nyin tadi.

Dulu ari nya, kena malam Hari Lima, sebedau bekejang ke Merit, Kristoffer ngulu pengawa BBQ ke diatur ba Rumah Taba, Nanga Ah, Sungai Pila ke digulu lebih 150 iku mensia.

Lebih 30 iku bala ketuai rumah ari Merit, Metah enggau Sungai Pila nyempulang iya lebuh ke nemuai nya.

Advertisement