Anda di sini

Kededua piak patut berunding, atur pengawa bepilih presiden

Advertisement

KUCHING: Mandal Presiden Parti Sa’ati Rayat Sarawak (SUPP) Datuk Lily Yong ngasaika pengawa bepilih, milih baru presiden parti, sebengkah jalai ke dijangka ulih nyelamatka parti nya ari dikinsil Opis Pengerejister Gerempung (ROS).

Kelimpah ari nya, iya madah, penyarut ke nyadi entara dua piak ke betuaika presiden Tan Sri Peter Chin Fah Kui enggau chairman SUPP Sibu Dato Sri Wong Soon Koh ulih diketuka ari terus ngenyaika nama parti.

“Kededua piak patut nyukung penuduk ke ‘menang-menang’ lalu nyangka enggau chara baka tu, pengabis manah kena mutarka pekara tu, iya nya ngaga pengawa bepilih baru.

“Awakka undi aja bebunyika sida iya lalu sapa ke teulihka undi pengabis tinggi, nya mih nyadi tuai,” ku iya madah lebuh dikerandau ditu, ensana.

Lebuh ditanya ngagai Yong, enti Chin besetuju enggau perambu nya, ku iya:

“Enti deka nyelamatka parti, kami semua patut duduk sama lalu mutarka penanggul nya enggau chara ke manah,” ku iya.

Kelimpah ari nya, Yong mega ngarapka kededua piak nya badu agi charut sereta beranuka pangan diri nengah media.

Iya nambah, penyarut nya lama endar udah lalu semua kaban parti berasai sinu endar ati mega gaya parti nya baka nya diatu.

“Anang nambah garam ba telih laban nya utai ke enda manah.

“Enti kitai semua ngemeratka parti, nadai seiku ke betul tauka salah tauka amu mata ngemeratka diri aja.

“Patut nadai agi ngira sapa ke nyadi ‘hero’ lalu nadai sapa ulih engkejuk ke atas lalu madahka diri empu ‘hero’,” ku iya.

SUPP betapi enggau nasit ke enda tentu manah laban udah nerima surat nerangka kebuah ari ROS kena 6 Januari tu tadi, ke minta parti nya nyaut madahka kebuah opis pengerejister gerempung enda patut nginsil parti nya.

Parti nya udah bepechah ngagai dua piak, sepiak betuaika Chin lalu sepiak agi enggau Wong, berindik ari pemutus Aum Deligit Tiga Taun Sekali (TDC) kena bulan Disember 2011.

Advertisement