KUCHING: Opis Menteri Dalam Nengeri (KDN) deka berandau enggau Opis Menteri Pengangkut (KP) bekaul enggau mekanisme tauka chara pemadu manah dikena ngemunaska ‘lori hantu’ ti dipadahka nitihka peneka diri di Jalai Bakun-Tatau.
Nitihku Sapit Menteri Dalam Nengeri, Datuk Dr. Wan Junaidi Tuanku Jaafar, nyema orang ti bekaul ditemu atur ke terit patut dipejalaika, laban nya ukai semina ngenusahka penguna jalai alun bukai tang ngenyaika perengka pengangkut ti berega RM600 juta nya.
“Aku deka mai pekara tu ngagai Opis Menteri Pengangkut dikena ngemunasaka pekara tu, aku arap bendar sida bisi undang-undang ke patut dikena nangkap sereta ngambi lori nya.
“Enti ulih ditangkap, simpan (lori)…anang meri pulai baru laban nya enda direjister,” ku iya lebuh dikerandau di Taman Sepakat Jaya II, Demak Laut ditu, lemai kemari.
Iya mansutka pekara nya lebuh dipinta meri penerang bekaul enggau ripot The Borneo Post pasal lori enda direjister dipadahka nyadi ‘lori hantu’ ti mengkang ngerembai di Jalai Bakun-Tatau taja pan mayuh ripot pasal nya udah digaga.
Parti Rakyat Sarawak (PRS) pampang Belaga nengah sebengkah penerang berita ti dipansutka ensanus, minta piak ti bekuasa bejalaika pengawa laban lori nya ngeruga pengelikun penguna jalai alun bukai.
“Manah agi enti JPJ numbuhka palan pemeresa tauka pos tetap kena matau trafik.”
Wan Junaidi ti mega Kaban Parlimen Santubong madahka ‘lori hantu’ nya dipejalaika kompeni kayu enggau kebun bedandang besai ti nadai ngembuan tanggungpengawa nya pintar.
Ku iya, raban penerit adat baka Polis DiRaja Malaysia (PDRM) enggau Jabatan Pengangkutan Jalan (JPJ) ulih ngenyakah tauka ngenegapka agi operasi tang piak ti nadai tanggungpengawa nya lebih pintar ti semina bejalai maya malam hari.
Bejaku baru iya madahka piak polis enda ulih semina mekuh 100 peratus ngagai isu nya laban mayuh komitmen bukai.
“Aku ulih minta piak polis ngaga operasi (malam hari) tang lebuh meda polis nadai (operasi), baru sida nya ngaga operasi.
“Berapa malam kitai patut bejalaika (operasi)? Sida tu mega ulih matau, nganjung spy (pematau) ngambika meda nyema nadai polis baru sida beoperasi baru,” ku iya.
Nya alai iya minta kompeni ti bisi ‘lori hantu’ lebih manah bejalaika tanggungpengawa.
“Piak konsesi balak tauka kebun bedandang besai nya mesti deka bisi tanggungpengawa.
“Nya duit perintah enggau duit rayat ti dikena ngaga jalai ti meri penguntung ngagai semua, ukai ngambika dijaika piak lori enggau balak,” ku iya.