KUCHING: Standard Operating Procedure (SOP) patut diserenih dikena ngenukuka penerit atur pengawa ngena senyata baka pistol, lebih agi ba raban pengelikun di menua tu.
Pekara nya dipadahka Sapit Menteri Dalam Nengeri Datuk Dr. Wan Junaidi Tuanku Jaafar (gambar) lebuh dikerandau pengarang berita ditu kemari.
Iya madah, atur nya dikena nyeliahka senyata baka pistol ulih dichuri tauka lenyau ketegal pengilap raban pengelikun sekalika maya bejalaika tanggungpengawa tauka enda.
Dulu kelia, maya urung taun 1970, polis nadai mai senyata kelimpah ari polis Field Force ti bejalaika pengawa penyempulang lebuh bisi mai barang baka duit enggau ke bukai nitihka patut, ku iya.
Urung taun 1980 ku iya, polis dikemendar mai senyata sereta SOP bisi tukar baru ti ngemendarka polis mai senyata pulai ke rumah.
“SOP endang udah bisi, nya alai kitai deka beratika baru (SOP) baka ni kitai ulih nerit tauka ngemanahka agi atur ngena senyata jemah ila.
“SOP ke udah bisi endang patut dipansik baru ngambika pekara ti nyadi dua hari ke udah enda ditandu, tambah mega reta tengkira tu ke lenyau pan dipasuk dalam riput auditor general.
“Pekara tu (lenyau senyata) nyadi baru sereta nyadi pun taun 2014, tu nunjukka kelai ti enda manah ngagai piak polis bekaul enggau nyaga senyata,” ku iya seraya nandu baru SOP patut sereta deka dipansik baru.
Iya mansautka pekara nya lebuh ditanya sereta dipinta meri penerang bekaul enggau dua raban polis ti mabuk maya bejalaika pengawa ngujungka pistol enggau seterum dichuri orang.
Dalam riput berita dua hari ke udah ngeriputka dua iku polis di Kuala Lumpur ditemu mabuk maya bejalaika pengawa.
Iya arap bendar Opis Menteri Dalam Nengeri nadai pilih bulu bekaul enggau pekara nya sereta ngarap sereta ngawakka piak polis mansik enggau silik kes nya.
Kelimpah ari nya Dr. Wan Junaidi lebuh ditanya sekalika ulah tauka dispilin raban pengelikun tauka polis udah majak tendur iya madah, senentang displin udah bisi pengelemi.
Ku iya pengelemi tauka kurang disiplin nya beduduk ari pengilap ari raban nya empu, laban latih ti terit lebuh nyadi polis kemaya hari tu ulih keluar dalam media sosial sereta dikeenggaika raban bansa.
Latih displin ke tegap ulih nempa pemanah ulah seseiku raban pengelikun tauka raban polis maya bejalaika tanggungpengawa nyaga pengelantang enggau pengelikun menua enggau rayat, ku iya.
“Bisi pengelemi senetang pemanah ulah tauka disiplin, kelia lebuh kami belatih semilan bulan semua nya (latih disipilin) dipasuk dalam latih, tang ke diatu pengelama polis belatih selalu betukar, nya alai pengelemi nya sekeda datai ari raban bansa.
“Kitai raban bansa patut nemu latih disiplin deka nempa ulah ti manah, laban enti latih disiplin ke tendur deka nempa pegawai ti tendur, nya alai orang ti ngena Facebook tauka Twitter patut nemu pasal tu.
“Anang sepeneka ati ngutuk lebuh latih displin khas dipejalaika maya belatih nyadi polis (tauka raban pengelikun),” ku iya ti dulu ari nya ngulu pengerami nyambut Maulidur Rasul ti diatur Komiti Pengelikun Genturung Pendiau Kampung Seberang Hilir (JAKASEH) di Dewan Sekolah Kebangsaan Matu Baru, ditu kemari.