KUCHING: Maya betapi enggau sebarang penanggul ba pejalai, kitai mulaika diri ke pun baru, ku Menteri Pengawa Dagang Temuai, Datuk Amar Abang Johari Tun Openg.
Nyema nabi orang Islam, Nabi Muhammad seiku ketuai di menua Arab kelia, dibasa sereta dipuji jalai iya megai menua sereta nyerakup raban bansa ke diau di sitak menua nya maya nya.
“Iya baka ketuai ke patut dichunto. Lebuh Iya pindah ari Mekah ngagai Madinah, Iya ngempung perintah Islam keterubah ke nyamin hak genap iku mensia.
“Taja pan maya nya Iya nyadi Ketuai Pengatur Pengawa pemerintah baru pampang Madinah, bisi 63 artikel dalam pampang nya, lalu sebagi ari pemerat, bebasaka hak tiap iku mensia,” ku Abang Johari lalu nambah, orang ke ari pengarap bukai pan bebasaka hak Perintah.
Iya madah baka tu lebuh dikerandau sepengudah bejadika Gempuru enggau pengawa Bebaris nyambut Maulidur Rasul di luar Surau Bandarsah, Jalai Datuk Ajibah Abol ditu, kemari.
Iya madah, baka nya mega di Sarawak, alai Perintah masa hak tiap iku mensia ke diau di menua tu.
“Tu ke digaga kitai di Sarawak, kitai ngaga pengawa bansa tu, bebasaka hak seseiku datai ngagai tikas ke pengabis tinggi…Maya betapi enggau sebarang penanggul, kitai mulaika diri ke pun baru,” ku iya.