Anda di sini

Ulah kepapas ba pengawa chelak rumpak enda ngeruga penyakah pengansah seni, ku Isa Lee

Advertisement

KUCHING: Industri muzik di Sarawak lebih agi muzik Iban diatu majak ranchak taja pan ulah sekeda orang ti kepapas sereta amu ngemajakka pengawa chelak rumpak.

Taja pia, ulah ti baka tu enda ngeruga penyakah  raban pengansah seni ngatur pengawa pemerindang baka konsert, merindang ba pengerami, ngaga lagu sereta ngeluarka album.

Raban artis kitai, pemuzik, penanyi, sound engineer sereta mega orang ti nyendiaka sistem audio-visual bela ngembuan awak ke sebaka. Palan pemerindang karaoke pub & Lounge sereta pengerami perintah, kompeni enggau korporat, JKKK rumah panjai suah ngangauka raban artis ngerami pengawa sida.

Tikas ekonomi ti majak manah nyadika kebuah mayuh orang berani ngatur pengawa pemerindang sereta sanggup mayar raban artis besai agi ari ke dulu. Kelimpah ari nya, sida mega nemu raban artis kitai patut dibayar nitihka pematut.

Urung taun 80 nyentuk ke 90 suba, bayar RM500 ungkup seiku penanyi popular Iban merindang ba sebengkah pengerami udah dikira chukup besai.

Diatu, mayar seiku penanyi mai lima buah lagu penyampau RM1,000 ba tiap pengerami ukai nyadi penanggul besai lalu tu mandangka kitai bansa udah nemu meri basa ngagai raban artis.

Sapit Presiden Gerempung Pengansah Seni enggau DayaIdup Dayak (PPSKDK) ke mega seiku pemain guitar bass Isa Lee ke udah lama nyerungkai industri muzik Dayak diatu nguji ngatika diri tauka solo ba pengawa ti dikerindu, iya nya merindang mensia mayuh.

Bekenaka nama Simple Play, Isa netapka gaya muzik enggau chara pemerindang iya mudah sereta enda begunaka bajet besai.

“Kes ngubah angin baka tu nyadi ba mayuh raban artis enggau pemuzik dalam menua tu,” ku Isa ke kala nyadi ketuai mayuh band sereta orkestra kenyau ari jeman 80 di nengeri tu.

Ditanya kebuah iya ngambi pemutus nyadi pemuzik solo tauka one piece band nyadi keyboardist, Isa madah iya deka nukar angin.

“Kebuah kedua, majak mayuh orang milih begunaka one piece tauka two piece band ketegal bayar enda besai enti dibandingka enggau band bebala mayuh,” ku iya.

Isa madah iya milih pengerami ti mit sereta umbas iya pemesai baka ke pengawa ngintu hari pengada, pengerami gempuru ruang bilik, pengerami gerija, merkat rumah sereta ke bukai.

“Kelimpah ari nya, aku ulih mai penanyi bukai ti dikedaka orang empu pengawa,” tandu iya.

Bepelasarka peneleba ke udah, Isa ngasai raban orang ke datai ngulu tiap pengerami deka tepantup ati enti sida diberi awak belagu.

Dikena nutup randau, Isa ngarapka semua raban artis beserakup nengah muzik ketegal muzik tau mai pengelantang enggau pengelikun enda ngira bansa, agama sereta chura tubuh.

Barang sapa ke begunaka servis Simple Play tau betanya ngagai lumur 013-8266081.

Advertisement