BENUNG DIPANSIK: Seraban polis (ba gambar bawah) benung nasat endur kerita Hilux ke kena pechah.
KUCHING: Seiku lelaki besenyataka pistol ngelarika diri lalu seiku agi bakih iya mujur ditangkap polis, udah lelaki nya mechah cheremin kerita Toyota Hilux di Jalai Jambatan Gantung, ditu, kemari.
Polis pampang Pengawa Salah Berat (D9) ari Indu Opis Polis Kontinjen (IPK) Sarawak, ke benung mansa endur nya maya nya urung pukul 11 pagi, tepedaka dua iku lelaki benung mechah cheremin belakang kerita 4X4 nya.
Nitih ku Ketuai Polis Pelilih Menua Kuching ACP Roslan Bek Ahmad, saspek lari ngena sebuah mutosikal ke dichuri ari rumah enda jauh ari endur nya.
“Maya nya polis ngagai saspek lalu bisi begelut mimit enggau seiku ari saspek ke mujur ditangkap udah nya.
“Seiku agi ari lelaki nya, lalu mansutka pistol lalu nguji ngachit lalu maya nya dua iti seterum labuh ba atas jalai,” ku iya ke netapka kes nya bisi nyadi.
Saspek ke ditangkap deka ditan riman lalu deka ditasat.
Ketuai pampang Pengawa Tasat Pengawa Salah Pelilih Menua Kuching, DSP Lim Bak Phai maya nya, bisi ba endur nya begulai enggau Unit Forensik IPK Menua nasat pekara nya.
Pengawa ngiga saspek mega ngena ukui penyidi ari Unit K9 IPK Sarawak.
Polis mega bisi ngagai rumah saspek ke mujur ngelarika diri, di Kampung Tupong lalu tetemuka sebuah mutosikal ke dijangka dichuri.
Kelimpah ari nya, orang ke ngempu Hilux nya ke enggai nama iya disebut ditu, madahka iya semina nemu bisi utai nyadi udah ninga utai inggar ari baruh opis iya, lalu beguai nurun ke baruh.
Lelaki ke beumur urung 40 taun nya madahka, nadai utai bukai diambi ari kerita Hilux nya, tang semina beg sekula anak iya aja.