Penemu parti nya ti deka bekempit enggau penyakal enda ngeruga penegap penyukung BN
KUCHING: Pemutus Sarawak Workers’ Party (SWP) bekempit enggau penyakal ba pengawa bepilih negeri ke deka datai tu ila enda ngenyitka runding sayap nembiak Parti Rakyat Sarawak (PRS).
“Berita nya enda ngasuh kitai tekenyit. Kenyau ari hari keterubah ditumbuh, SWP nginjau nama Barisan Nasional dikena matak sukung pengundi ba menua pesisir.
“Taja pia, sida enda mujur ba pengawa bepilih besai ke baru udah tembu ketegal runding raban pengundi diatu udah chukup lanjau lalu ngelala tuju SWP ke endar,” ku Ketuai Penerang Nembiak PRS Bit Surang madah ngagai The Borneo Post kemari.
Taja pan ba penuduk ke kala dikuasa presiden SWP Larry Sng, Pelagus, Bit madah Nembiak PRS enda irauka pekara nya ketegal sida pechaya parti deka ngerampas penuduk nya ba pengawa bepilih ti deka datai tu ila.
“Kitai deka bebendar ngerampas penuduk nya. Kitai deka nyaup nentuka barang sapa aja chalun ke dipilih ketuai renggat tinggi menang ba penuduk nya,” ku Bit.
Ba pengawa bepilih nengeri ke udah, sapit presiden SWP George Lagong menang di Pelagus nengah majoriti 5,740 undi.
Naka ke diatu, entara chalun ke disadang disabung PRS iya nya Stanley Nyitar ke mega chalun ba pengawa bepilih nengeri ke udah.
Kelimpah ari Stanley, chalun PRS ke bukai iya nya sekretari politik kepala menteri Wilson Nyabong, seiku orang dagang Dato Kristofer Nyuak enggau Walikota Kapit Philemon Nuing.
Ngenang isu bukai, Bit madah SWP deka napi pemar ngenanka Pelagus ba pengawa bepilih nengeri ke deka datai pengudah parti (SWP) enda mujur ngamatka mayuh semaya ti dipansut maya pengawa bepilih ke udah.
“Rayat udah ringat sereta nyesal nyukung lalu ngundi SWP ba pengawa bepilih ke udah,” ku Bit.
Iya madah, pengudah SWP begempung enggau penyakal, sitak nya enda deka nerima sebarang agih belanja ungkup projek pemansang ketegal perintah nengeri enggau besai mengkang dikuasa BN.
“Maya Sng mengkang enggau BN suba, kitai meda nadai mayuh pemansang dibai iya ke Pelagus. Selangau ke kala sebaka enggau pendiau Ng Merit di Pelagus suba, diatu dah diangkat nyadi pelilih menua tang Ng Merit lalu mengkang baka pendiau asal.
“Enti Sng enda ulih ngemansangka Pelagus maya iya bekuasa katiku iya ulih mai pemansang diatu,” ku Bit.