MINTA PUTARKA PIAK BEKUASA: Bah tunggal ti ngampuhka kandang menua RPR Sungai Plan Lot ditu, pagi ensana ngerugika peranak menua ti nguan menua nya.
Genturung pendiau ke suah ampuh maya bah ngenyit berindik ari sistem parit enggau entali ke enda menuku, suah ngerugika peranak menua dia
BINTULU: Mensia mayuh ti diau ba sebengkah genturung pendiau di Genturung Pendiau Rayat (RPR) Sungai Plan Lot ba Jalai Tanjung Kidurong ditu balat bendar teguran beduduk ari bah tunggal ti ngampuhka rumah enggau kandang endur nya urung pukul 5.30 pagi ensana.
Bah tunggal nya nyadi beduduk ari ujan ti enda ngetu semalam-malam nya ti ngujungka ai ari parit besai melumpa lalu ngujungka ai ngampuhka kandang menua nya lalu sekeda rumah bisi tama ai penalam 2 kaki.
Sida ti tasah laban ampuh bah tu endang nadai daya berangkutka semua barang enggau reta tengkira diri laban ai niki naka penyampat sereta ngenyit.
Sandine Bennidect, 40, seiku ari orang ti ngempu rumah dia madah, penusah bah tunggal endang iya suah nuntung palan pendiau di Sungai Plan Lot lebih agi maya musin ujan baka tu.
“Enggau tu, aku endang ngarapka bala pemesai menua ti megai kuasa nyaga sistem parit enggau entali ai ulih berundingka chara ti engkeman kena nagang penusah baka tu nyadi dudi ila,” ku iya.
Kebuah pia, enti penusah tu enda diputar, iya deka mai pengerugi ti balat ngagai bala raban orang ti ngempu rumah ditu laban baka taun ke udah-udah, penusah ti sama mega nuntung bala mensia mayuh ti diau ba RPR Sungai Plan Lot tu.
Ku iya, bala penguasa enggau opis bekaul bukai ti diberi tanggungpengawa ngatur sistem parit enggau entali ai ba menua tu semampai ngelasi parit ba kandang endur rumah ditu ngambika enda nakat apat.
“Ba taun ke dulu suba, bah tunggal bakatu endang udah balat meri pengerugi ngagai kami sebuat ti nguan menua ditu laban mayuh reta tengkira kami rusak laban ti enda ulih dikatung sereta dipindahka ngagai endur ti tinggi agi,” ku iya.
Nya alai, sida ti nguan menua nya dia endang ngarapka penusah tu ulih diputarka enggau jampat nengah jalai begaga ke sistem parit ti besai agi ngambika penusah ti baka tu enda nyadi agi jemah ila.
Genturung pendiau RPR Sungai Plan Lot tu endang entara palan genturung pendiau ti suah ampuh bah tunggal di Pelilih Menua Bintulu.