Anda di sini

Peranak Kpg Kasindu mantah ulah kompeni nyungkur Bukit Sabetong

Advertisement

ANJUNG DULU SURAT BANTAH KITA: Pemesai ari JTS Kota Samarahan benung nerangka pemerat ke nyadi nuntung genturung pendiau Kpg Kasindu.

KOTA SAMARAHAN: Urung 50 iku peranak menua ari Kpg Kasindu, Sebuyau mantah pengawa tiga buah kompeni ke bisi minta pemendar deka nyungkur Bukit Sabetong di genturung pendiau nya, endur ngulihka batu kuari.

Ketuai raban ari genturung pendiau nya ti diuluka Nur Khairunisa Abdullah madah, genturung pendiau ke diuan 38 ruang bilik nya endang udah disukat perimeter, sereta madahka pemesai projek kuari nya dijangka mungkur 489 hektar.

“Kami endang enda setuju genturung pendiau kami disungkur kompeni kena sida iya ngaga kuari, laban mayuh agi pengerusak ke deka dibai sida iya ari ngelakka kompeni nya peneka ati ngambi tanah kami,” ku Nur Khairunisa.

Peranak ke nguan menua nya tebal bansa Iban sigi ngembuan genturung pendiau nya ari aki ini sida iya kelia, lalu ngembuan umai sereta kebun kelimpah ari genturung pendiau nya ke ngembuan bukit ke manah.

Entara sekeda genturung pendiau ke besemak enggau Kpg Kasindu, iya nya Entangor , Jeragam, enggau Bulan.

“Kami enggai baka Kpg Entangor, alai mensia mayuh ke diau di genturung pendiau dia diasuh angkat dalam timpuh 7 hari lalu madah ngagai mensia mayuh dia enti sida iya enda angkat, sida iya diau di tanah ‘haram’,” ku Nur Khairunisa.

Iya madah munyi nya lebuh dikerandau nguluka orang genturung pendiau nya betemu mantah pengawa kompeni ke deka minta nyungkur genturung pendiau dia ngagai opis Tanah enggau Survei ditu, kemari.

Iya madah, sida ti diau di Kpg Kasindu endang bisi surat tanah, lalu madah kompeni tauka Tuai Kampung, Lamat anak Man tauka JKKK genturung pendiau nya nadai hak nyual tanah sida dia.

“Nya aja reta tengkira pemisi kami, taja pan kami tu ukai orang ke bepemisi,” ku iya.

Iya madah, mensia mayuh ari genturung pendiau dia kala baum enggau Opis Kunsil Mit Sebuyau, kena 26 Oktober taun nyin tadi, ke bisi madah sereta mantaika 41 lis nama orang ari genturung pendiau dia ke besetuju nyual tanah sida iya.

Nitih ku Nur Khairunisa, surat lis nama nya surat palesu, laban sida iya nadai kala nyain sebarang surat sebedau tu.

“Kami nadai kala nyain surat besetuju deka nyual tanah di genturung pendiau kami, kebuah kami ngeripot ngagai polis pengawa salah ngemelsuka surat danji nya,” ku iya, lalu nambah ripot polis udah digaga kena 28 Oktober taun nyin tadi tang datai ke seharitu, bedau nerima sebarang timbal ari polis.

Siti agi utai ke nyelai ku Nur Khairunisa, laban ari nama dalam lis nya, orang nya udah parai dalam bulan Mei taun nyin tadi.

“Nya alai, kami enda besetuju kompeni-kompeni tu deka nyungkur tanah kami laban kami enda ngemendarka nya. Bukit ba genturung pendiau kami dia berapa besai, pemayuh utai ke udah ditanam kami nyengkaum pendam. Ulih ka sida mayar pemayuh rengka nya dia?,” ku iya.

Lebuh ditanya ngagai iya (Nur Khairunisa) bakani ku sida iya nemu bisi kompeni deka ngambi tanah sida iya dia, iya madah:

“Kami nemu laban sida kompeni nya bisi nganjung utai kia utai pakai, duit saguati,” ku iya lalu madah kebuah sida iya mantah, laban nadai timbal ke diterima sida iya, kelimpah ari ngetanka hak sida iya.

Iya madah baru, enti sema pemansang deka digaga baka sekula, klinik tauka infrastruktur bukai, sida iya nyangka ulih bekerejasama.

“Tang enti ketegal ngambi penguntung kediri empu, kami enda ulih nerima nya,” ku iya.

Ba pekara nya mega, pemesai ari Opis Tanah enggau Survei (JTS) sitak Kota Samarahan ngelalau sida ari genturung pendiau Kpg Kasindu nya nganjung surat bantah pasal kompeni ke deka nyungkur genturung pendiau nya.

Kemari, lebuh raban nya betemu enggau Opis JTS Kota Samarahan, lis nama orang ke besetuju nyual tanah di sitak nya (dalam fail) udah datai ba opis JTS ke diberi kompeni nya.

“Kami semina roses surat peminta ari kompeni nya, ngemendar ukai pengawa kami laban surat nya ila deka dianjung ngagai Indu Opis kami lalu ditangkan pemendar ari menteri…Ukai kami ngemendar tauka enda,” ku pegawai nya.

Surat ari tiga buah kompeni udah datai ba opis JTS Kota Samarahan lalu semua surat nya agi dalam proses.

“Tiap peminta enda semesti iya dikemendarka, ukai nyamai ngemendarka utai baka tu, ngambi timpuh ke panjai. Kami semina proses, tang enti udah bisi bantah baka tu, enti nitih, sigi enda dikemendar…Tang anti mih dulu pemutus ari Indu Opis Indu kami,” ku pemesai nya.

Taja pia, pemesai nya madah, enti amat genturung pendiau nya bisi udah disungkur kompeni ke bedau teulihka sebarang pemendar, sida iya tau kena ukum sereta saman.

Surat bantah ari mensia mayuh ari genturung pendiau nya nuju JTS Kota Samarahan deka diserah pengabis tumu, lemai kemari tauka kena hari Tiga tu.

Advertisement