Anda di sini

Pengulu Randi ngarapka pengawa nanam getah penyungkak ekonomi peranak menua

Advertisement

MIRI: Seiku Ketuai Raban Bansa di Lambir, Pengulu Randi Elon arapka pengawa betanam getah ke balat dipejalaika ba kandang menua nya suba tau ditanam baru nengah chara komersil.

Ku iya, pengawa betanam getah nya nyadika batang pengidup sereta penatai pemisi peranak menua di Lambir enggau Sibuti suba.

“Taja pan pengawa betanam getah nya majak kurang sereta semina dikereja pekebun mit aja, tang mengkang dipejalaika ba Lambir enggau Sibuti,” ku iya.

Pengawa maduka Kaban Parlimen Sibuti Ahmad Lai Bujang nyadi Chairman Lembaga Amanah Majlis Promosi Eksport Getah Malaysia (MPEGM), udah ngandalka ati penanam getah lebih agi pekebun mit.

“Aku ke nyadi ketuai raban bansa ba sitak iya (Sibuti), berasai temegah endar ati laban iya udah dipaduka mangku pengawa nya.

“Aku sereta peranak menua Lambir enggau Sibuti arapka iya ulih mai berita ke manah ngagai penanam getah enggau pekebun mit di menua tu laban pangku pengawa iya nya bekaul engagu getah,” ku iya.

Ku Randi, agi mayuh orang ba sitak nya bedau nemu Ahmad Lai dichiri mangku pengawa nya.

Ku iya, enti pengari rayat nya udah nemuai ngagai genturung pendiau tauka rumah panjai nerangka sentang pangku pengawa enggau bidang kuasa nya ila, tentu mayuh orang teperansang sereta nanam getah baru ila.

“Aku enggau peranak menua ditu endang nganti penatai iya mai berita manah ngagai kami sereta meri jaku peransang ngagai mensia mayuh lebih agi ke benung sereta baru deka nanam getah,” ku iya.

Ku iya, laban Ahmad Lai udah duduk ba sebengkah ari penuduk besai nya, pengingin peranak menua ti deka meda kandang menua Sibuti kelebih agi Lambir nyadi palan endur nanam getah ke pemadu besai di utara menua, ukai nyadika penanggul agi.

Berebak engagu nya, Lembaga Amanah MPEGM di dipegai Ahmad Lai sebengkah ari opis ke ari baruh pegai Opis Menteri Kebun Dandang Besai enggau Komoditi Malaysia.

Advertisement