PERAMBU PENGAWA DAGANG: Kilat (tiga ari kiba) begulai enggau kaban komiti bukai pengudah atur aum nya.
KUCHING: Datuk Joseph Salang Gandum deka nyadi ketuai raban ari Balai Dagang Enggau Industri Dayak (DCCI) nemuai seraya belajar ngagai menua Myanmar kena bulan Februari tu ila.
Chairman Komiti Pemansang Dagang DCCI, Kilat Beriak madah, penemuai ngelama lima hari belabuh ari 10 Februari, mega penemuai tu kedua Balai Dagang ngagai menua tasik.
“Nengah penemuai nya mega DCCI arapka, raban ke enggau ila ulih belajarka pemansang ke nyadi di menua Myanmar, kelebih agi ba chara idup enggau ekonomi di menua nya seraya beratika peluang dagang sereta beranakka puku,” ku iya.
Ku iya baru, Salang ke nyadi Chairman Kunsil Penyanding Penemu 1Malaysia Sarawak (1MSAC) ke mega Kaban Parlimen Julau sereta ex- Sapit Menteri, deka nyadi ketuai raban ari DCCI nemuai sereta baum enggau raban ari Balai Dagang Enggau Industri Myanmar.
Sida mega nagit deka berandauka kerejasama ba pekara dagang temuai enggau betanam betupi, ku iya.
Dalam bulan Ogos taun 2012, DCCI udah ngatur penemuai ngagai keterubah endar ngagai menua 50 ke tebal agi diarika bala orang dagang raban Dayak enggau profesyenal. Maya nya sida udah nemuai ngagai Ho Chi Minh, bandaraya ke pemadu besai ke mega nyadi hab ekonomi di menua nya.