Iya ukai semina ngemansang tang deka nusun sereta ngemanahka kandang mengeri Kuching
KUCHING: Projek Pemansang Baru Darul Hana ukai semina nyadi sebengkah projek pemansang dalam mengeri tang mega nyadi sebengkah projek nusun baru mengeri Kuching ngambika setipak enggau gaya sereta tikas pemansang ke diasai diatu.
Taja pan pia, Kepala Menteri Pehin Sri Abdul Taib Mahmud madah, projek nya deka ngenanka adat, main asal sereta gaya pengidup bansa Melayu ti ngembuan penyiru.
“Rayat ba kampung ti deka dikemansang kitai nengah projek tu ngembuan ulah ti nyadika chuan kitai nirika komuniti ti bisi pengering enggau penegap ngenanka penyerakup.
“Jeman diatu, nadai seiku orang nyangkal bansa Melayu enggau bansa bumiputera bukai ngembuan penegap kaul beserakup ti tinggi lalu nya mih pekara ti patut dikemegah kita,” ku iya maya bejadi Projek Pemansang Baru Darul Hana di Dewan Undangan Nengeri Baru ditu, kemari.
Beratika pemansang ti nyadi ba mengeri Kuching baka di Batu Kawa, Matang, Samarahan lalu pia mega di Samariang, Santubong, Taib madah, iya bisi kesal ketegal genturung pendiau Kampung Seberang Hilir ke dikumbai Darul Hana diatu mengkang nyadi sebengkang kandang endur ke jauh tinggal ari atur pemansang.
Ku iya, pekara nya enda patut nyadi pengudah Sarawak majak mansang lalu disadang nyapai tikas nengeri maju manggai ba taun 2016.
“Berapa taun ke udah aku ngasaika diri diansak ngemansang genturung pendiau nebing sungai tu. Pengudah berandau enggau Abang Johari enggau nerima sukung ari perintah besai lalu pia mega nerima agih belanja ari perintah nengeri, kitai deka numbuhka sebuah mengeri baru endur mindahka sida ke udah lama besekut.
“Kitai ngelanchar konsep pemansang baru Darul Hana ti deka disikap ngena perengka guna ke chukup sereta lantang endur diau ba tanah pemesai lebih 700 ikar.
“Taja pia, pemesai tanah nya mengkang enda chukup endur lebih 3, 500 ruang bilik ke nguan Kampung Seberang Hilir lalu kitai merambu ngaga mayuh flat endur diau,’ku iya.
Maya ke diatu sebuah rumah kekadang diuan entara 3 ngagai 6 buah ruang bilik lalu kitai deka nyendiakka rumah baru ti lantang endur sida diau, tandu iya.
Iya netapka Darul Hana deka nyadi sebuah genturung pendiau orang Melayu taja pan dikelingi mengeri besai ti ngembuan ekonomi tinggi.
Bela bisi ngulu atur pengawa nya, bini Taib Puan Sri Ragad Kurdi Taib, Sapit Kepala Menteri Datuk Patinggi Tan Sri Alfred Jabu, Menteri Pengawa Berumah Datuk Amar Abang Johari Tun Abang Openg, Sekretari Perintah Nengeri Tan Sri Datuk Amar Mohd Morshidi Abdul Ghani enggau raban menteri bukai.