KUCHING: Menteri Pengawa Berumah Datuk Amar Abang Johari Tun Abang Openg pechaya Projek Pemansang Baru Darul Hana deka mai pemaik ngagai 14,460 iku peranak menua ti nguan Kampung Seberang Hilir, Kuching.
Ku iya, penyampau nya ngarika 3,647 buah ruang bilik ti udah lama diau besekut ari Kampung Boyan nyentuk ke Kampung Bintawa Hilir.
“Projek ke dipun ari buah runding Pehin Sri tu deka mulaika pemaik enggau pengelantang kelimpah ari tau nyendiakka awak dagang ngagai rayat ba mayuh bengkah kampung ngelingi.
“Darul Hana deka nyadi sebuah mengeri baru ti disikap ngena semua perengkaguna lalu disadang nyaup ngangkatka Kuching nyadi bandaraya ti dikemegah semua,” ku iya ba jaku pengelalu bejadika Projek Pemansang Baru Darul Hana ba Dewan Undangan Nengeri Baru ditu, kemari.
Projek nya dipenyadi Kepala Menteri Pehin Sri Abdul Taib Mahmud lalu bela digulu sekeda menteri enggau menteri muda.
Abang Johari ke mega menteri ke megai tanggungpengawa projek nya nambah, Pehin Sri udah ngambi kira semua perambu ungkup timpuh ti panjai ba atur nusun pemansang mengeri Kuching.
“Aku pechaya Darul Hana deka angkat nyadi sebuah agi palan endur pengawa dagang ngerembai seraya kitai ngenegap kaul rama begulai enggau pangan diri.
“Rayat deka teulihka penguntung ari asil perambu ti ditusun ungkup timpuh 10 ngagai 15 taun ke deka datai,’ku iya.
Aku pechaya rayat deka ngasaika pengidup ti lantang lalu sigi ungkup kitai sereta rebak ke dudi, tandu iya.