KUCHING: Kaban Kunsil Nengeri (ADUN) Padungan ti ngarika DAP Wong King Wei ngelalu pengawa Sarawak Workers Party (SWP) ti numbuhka pampang tauka palan servis di Padungan.
Ku iya, palan nya deka nyaup DAP lebih agi iya ke nyadi pengari rayat ba kandang menua nya bejalaika pengawa meri servis ungkup pemaik rayat.
“Palan nya deka ngeringka pengawa DAP ba sitak Padungan lalu enda ngeruga penegap parti.
“Sida (SWP) mandangka pemaik kaul lalu kitai nyadang kededua parti ulih bekerejasama rat jemah ungkup pemaik rayat Sarawak,” ku iya lebuh dikerandau pengudah ngulu pengawa bejadi SWP pampang Padungan ditu, malam ensanus.
Iya nambah, kaul entara DAP enggau SWP deka nyadi sebengkah kerejasama ti manah ke alai kededua ketuai dalam parti ulih bekenaka alur nya endur bekunsi penemu enggau peneleba.
Ku iya, DAP dipun tauka parti ti tebal agi ngarika rayat ba kandang mengeri lalu SWP ba pun pengawa keran ngarika rayat di menua pesisir.
“Diatu kitai (DAP) keran nguji ngaul rayat ba menua pesisir lalu kitai pechaya SWP ulih nyaup kitai ba pekara tu lalu pia mega SWP dipeda keran ngaul rayat ba kandang mengeri baka ke dipeda kitai malam tu, numbuhka pampang di Padungan,’ku iya.
Kitai ulih mantu pangan diri lalu pechaya kaul tu tau mulaika pemaik ngagai kededua parti, tandu iya.
Dulu agi ari nya, presiden SWP Larry Sng ba jaku pengelalu iya netapka parti keran ngadu kerejasama enggau penyakal, Pakatan Rakyat lalu penumbuh SWP pampang Padungan deka ngepunka atur nya.
Tajapia, Larry netapka SWP enda deka ngelangkah tauka ngalahka parti ti nguasa kandang endur nya (Padungan).