DIPENYADI: Mong (tengah) ngerat riben kelai bejadika atur pengawa nya seraya dikemataka Whelthon (tiga kanan), Tuai Rumah Perie (sepiak kanan Mong) sereta peranak menua bukai.
Raban tu patut landik ngenataika penerang pengawa pemansang ke tau nguntungka peranak ke dipegai sida
SRI AMAN: Semua bala Ketuai Raban Bansa enda ngira Tuai Rumah, Pengulu, Pemancha tauka Temenggung dipinta terus bekerejasama enggau perintah ngambi ulih ngemansangka rayat ke dipegai sida.
Mayuh projek pemansang benung dipejalaika perintah patut dipetati sereta diterangka ngagai rayat ngambika sida enda terus tinggal ari pemansang, ku Menteri Muda Betanam Betupi Moden (Dagang Enggau Pansik) Sarawak, Datuk Mong Dagang.
Iya bejaku munyi tu ba Program Ketuai Begulai Enggau Rayat di Rumah Perie Manduh, Kampung Sunga Ai beserimbai enggau Pengerami Bejadika Pintu Gerbang Komiti Pemansang Enggau Pengelikun Genturung Pendiau (JKKK) rumah panjai nya apin lama ke udah.
Ku iya iya, kandang menua Lingga, Stumbin enggau Bijat udah mupok ngasaika pemansang lebih agi ari segi pemansang sektor betanam betupi, ke alai perintah udah ngemendarka penyampau belanja ke besai kena numbuhka palan bumai bedandang besai.
“Ketuai raban bansa bejalaika tanggungpengawa nyadung penerang ke betul baka pemansang ba pengawa betanam betupi, laban mengkang mayuh rayat enda nemu sentang gaya pemansang pengawa betanam betupi ba kandang menua sida,” ku iya.
Ku iya nandu, pemansang pengawa betanam betupi ba kandang menua Lingga, Stumbin enggau Bijat udah mupok meri penguntung lebih agi nyungkak penatai pemisi rayat ba kandang menua nya.
Ketuai raban bansa anang enda nerang ngagai mensia mayuh sentang projek pemansang ke benung tauka udah dipejalai, ti diasaika sida diatu.
Taja pia ku iya, genap bengkah penerang ke diterangka ngagai rayat nya enda patut bisi bekaul enggau penanggul diri empu tauka penanggul bukai ti tau ngeringatka ati rayat.
“Aku minta, genap bengkah penerang nya patut bisi disukung enggau kelai ti patut, ke alai ketuai raban bansa patut ngiga chara ke pemadu manah, baka ngaul sekeda ejensi perintah ngambika penerang sida nya bisi pengamat,” ku iya.
Kelimpah ari nya, iya mega minta sida anang sekekali nengah chara muntang baka nguna penyakal mutarka sesebengkah isu enggaika nguna awak nya ngulihka penguntung kediri empu aja.
“Ketuai raban bansa nya mega “orang tengah” ke dikearap nyadi mata enggau pending perintah, ti patut nyeliahka diri ari diguna penyakal ba pekara pemansang tauka mutarka penanggul nya,” ku iya.
“Aku ke nyadi pengari rayat (ADUN) Bukit Begunan, enggai meda orang ke jai runding nyalahka perintah enti sema sekeda dikemesaika penyakal nengah chara ke enda manah.
“Tanggungpengawa aku enggau semua ketuai raban bansa iya nya sama begempung sereta besaupka pangan diri ngambika rayat ulih nerima utai ti dikeinginka sida. Kena mih chara ke betul sereta anang ngarapka penyakal mutarka penanggul kita” ku iya.
Pengerami nya udah digulu urung 200 iku mensia ke tebal agi bala ketuai raban bansa enggau peranak menua nya.
Kelimpah ari nya, iya mega ngungkupka belanja taun 2014 ngagai JKKK Rh Perie enggau Biro Indu Sunga Ai, ke sama bela RM5,000.
Berebak enggau nya, Tuai Kaunsil Opis Pelilih Mit Sri Aman, Richard Tawan mega nyuaka Chek RM5,994 ngagai JKKK Rh Perie, Sunga Ai.
Sama bisi ngulu pengerami nya, Tuai Kaunsil Opis Pelilih Mit Sri Aman (MDSA), Richard Tawan, Pemesai Opis Hal Ehwal Khas JASA) Sarawak Pelilih Sri Aman, Whelton Lumpoi, Sekretari Mong, Howard Tambom, Pemesai JASA DUN Bukit Begunan, Jesi Bintoh Suntek, Senior Geologist, PetroFac, KL, Supian Suntek enggau Pemantu Penerang Sri Aman, Salleh Immun.