Anda di sini

Kaban SUPP pampang Opar tegap bediri di belakang parti

Advertisement

KUCHING: Kaban Parti Sa’ati Rayat Sarawak (SUPP) Pampang N1 Opar tetap tegap bediri di belakang parti seagi-agi penuduk parti nya enda dikinsil Opis Pengerejister Gerempung (ROS).

Chairman pampang nya, ti mega Kaban Kunsil Nengeri, Ranum Mina lebuh dikerandau kemari madah, iya enggau pampang nya agi nerima sukung penuh ari kaban parti pampang nya taja pan parti nya betapi enggau penyarut.

Lebuh ROS nganjung surat madahka kebuah ngagai dua pampang SUPP,  Bekenu, kaban SUPP di Opar tetap lembut penemu lalu enda ngaga sebarang pemutus ke tau ngeruga penuduk parti nya.

“Kami di Opar begulai enggau sekeda pampang bukai udah nguji mutarka penanggul ke nuntung parti tang penemu kami enda diterima sida sepiak nyin .

“Diatu kami nadai jalai bukai ke ulih mantu parti nya, kelimpah ari nganti pemutus ROS, udah sida nerima timbal ari kededua piak pampang nya, Bekenu enggau Piasau.

“Kami enda nemu sapa ke patut disalahka dalam pekara tu lalu naka ke diatu, awakka ROS ngaga pemutus dulu, lalu kami deka neruska pengawa kami baka selama,” ku iya.

Lebuh ditanya baru enti iya (Ranum) deka meda SUPP lalu bekubur aja, ku Ranum, maya nya deka nyadi maya ke pengabis sinu enti SUPP amat-amat dikinsil laban beratika SUPP nyadi parti politik ke pengabis tuai di Sarawak.

“Nyau pengelama parti tu ke udah, lalu udah ngasaika mayuh macham peneleba, tentu iya pedis ba kami ke nyadi kaban SUPP lebih agi meda pemati parti tu.

“Tang seagi-agi SUPP agi bediri, kami deka terus nyukung parti lalu enda beguai merambu utai ke enda ditemu deka nyadi,” ku iya.

SUPP Pampang Opar bisi lebih 1,000 iku kaban ke direjister ke nyadi penyukung tegap ngagai pemenang SUPP di sitak ke nyadi kubu tegap BN.

Advertisement