KUCHING: Chairman DAP Nengeri Chong Chieng Jen ngelaluka penemu bekerejasama enggau Parti Pekereja Sarawak (SWP) lalu deka begempung napi Barisan Nasional (BN) ba pengawa bepilih ke deka datai.
Bejaku ngagai pemberita kemari, iya ngakun kala berandau enggau presiden SWP Larry Sng sereta chairman PKR Nengeri Baru Bian sebedau Sng netapka pemutus deka begempung enggau penyakal.
Chong madah DAP enggau SWP ulih kereja begulai seagi sida ngembuan runding enggau tuju ke sama ba pekara politik.
“Aku ngasai udah netapka pemutus enggau terang, kitai ngelalu penatai SWP. Tang aku ngelempaika ngagai PKR netapka pemutus sida,” ku iya ba indu opis DAP ditu.
Naka kemari, PKR nengeri bedau netapka pemutus sekalika nerima SWP tauka enda.
Ditanya sekalika SWP bisi minta nyereta pakatan Rakyat (PR), Chong madah pekara ti dikerandau iya senentang kerejasama begulai lalu nadai lebih ari nya.
Sekalika PR deka ngenatika undang ngagai SWP, iya madah “Pekara nya deka ditetap pengudah aum PR nengeri.”
Iya madah raban ketuai PR nengeri deka betemu pengudah taun baru China, taja pia iya enda netapka maya.
Chong ke mega Kaban Parlimen Bandar Kuching sereta Kaban Kunsil Nengeri Kota Sentosa madah SWP (maya randau) nadai ngembuan niat deka bediri ba sitak mengeri.
“Nadai pemutus ke nyematak. Semina madahka penuduk ti dikedeka,” ku iya.
Chong mega ngakun BN mengkang tegap taja pan parti keran deka nguji masuk ngagai menua pesisir.