Ukai semina sida tu nyadi pesaka apai indai tang dikena mai ubah pemansang ke menua jemah ila
SPAOH: Anak mih reta ke pemadu beguna ukai semina ke sida sebilik aja, tang mega ke perintah dudi ila. Pemujur ke diulih sida diatu tau mai ubah pemansang ke jauh manah agi dudi ila, ku Menteri Kebun Dandang Besai enggau Komoditi Malaysia, Datuk Amar Douglas Uggah Embas.
Ku iya, menua Malaysia amat begunaka modal mensia ke nyulut ngambi bisi nyadika peturun nampung ngemansangka menua tu.
Kena ngemujurka juluk nya, perintah udah nyendiaka mayuh bengkah perengkaguna ngambi bisi diasaika rayat nyengkaum nyendiaka kereban sekula ke pemadu baru dikena mantu genap iku nembiak, raban sekula lebuh maya bejalaika pengawa ngajar enggau belajar, pia ku iya.
“Tu mandangka polisi perintah Barisan Nasional (BN) enda ninggalka tanggungpengawa mantu rayat, ukai baka ke dituduh sekeda raban orang,” ku iya.
Kelimpah ari nya, mayuh agi bantu bukai ti disediaka perintah baka Bantu Rayat Satu Malaysia (BR1M), Kedai Rayat Satu Malaysia (KR1M) nyengkaum bantu sekula nembiak, RM 100 seiku.
“Tu mandangka perintah BN enda ngemulaka semaya sereta bisi diasaika rayat kelebih agi ngagai sida ke diau di menua pesisir.
“Pengawa numbuhka Maktab Rendah Sains Mara (MRSM) di Betong ke mega sebuah palan endur nembiak ke nyulut nampung pelajar, bala nembiak patut anang ngelengka peluang belajar ba palan nya,” ku iya.
Uggah ke mega Kaban Parlimen Betong bejaku munyi tu lebuh bejadika Pengerami Nyuaka Bantu Khas Buka Sekula enggau Pengerami Nyuaka Gelar ngagai Nembiak Ke Nyulut Ba Peresa Ujian Penilaian Sekolah Rendah (UPSR) enggau Penilaian Menengah Rendah (PMR) 2013, Sekula Primari (SK) enggau Sekula Sekondari (SMK) Spaoh ba Dewan Sinaran, SMK Spaoh, ensanus.
Ku iya, genap iku apai indai tauka penyaga anang kelalu ngarapka tauka ngelempaika pengawa ngajar anak sida ba pengajar aja.
Berebak enggau nya, iya ngenataika pengaga ati ngagai semua bala pengajar SK Spaoh enggau SMK Spaoh ke udah bebendar nyungkak tikas pelajar sekula nya.
Ba peresa UPSR taun 2013, SK Spaoh udah teulihka puku rata GPS 3.00 dibandingka enggau 3.09 dalam taun 2012, ke alai tiga iku nembiak sekula nya udah bulih 5A. Ba peresa PMR, bisi empat iku nembiak ari SMK Spaoh udah teulihka 8A.
“ Tu mandangka pemanah tikas pelajar lalu arapka pemutus nya ulih sungkak belama ninting taun,” ku iya.
Nengah awak nya mega, Uggah madah, Opis Menteri iya udah nyendiaka mayuh bengkah bantu ungkup rayat baka bantu nanam sawit, getah, koko enggau lada.
Ku iya, rayat patut ngerebut peluang nya kena ngemansangka tanah ke enda kala dikena sida ngelama tu.
Ku iya nandu, kena ngangkatka ekonomi bala orang bukai enggau bekebun lebih agi di Spaoh, iya merambu muka ‘pasar minggu’ ngambika bisi endur rayat bejualka asil utai tanam sida. Pekara tu benung dikerandau enggau Opis Tanah enggau Survei sereta FAMA.
Dulu ari nya, Uggah nyuaka duit bantu khas buka sekula ngagai nembiak ari SK enggau SMK Spaoh, insentif khas ngagai nembiak ke nyulut ba peresa UPSR enggau PMR sereta nyuaka chek RM 10,000 ngagai PIBG SMK Spaoh.
Kelimpah ari nya, iya mega ngungkupka belanja RM6,000 dikena melanja ungkus ngatur ‘kem pengawas’, RM57,000 dikena ngaga atap ba lurung pejalai kaki di SMK Spaoh sereta RM10,000 agi kena kededua sekula nya bejalaika atur pengawa sida sepemanjai taun tu.
Sama bisi ngulu pengerami nya, Residen Pelilih Betong, Datu Romie Sigan Daniel, Sekretari Politik, Dr Richard Rapu, Pemesai Opis Pelajar Pelilih Mit Betong, Spawi Mahdi, Prinsipal, Kepala Pengajar, bala ketuai opis perintah enggau bala ketuai raban bansa.