Anda di sini

Aku deka mantu enti diguna

Advertisement

KUCHING: Ex-mandal presiden Parti Sa’ati Rayat Sarawak (SUPP), Datuk Yong Khoon Seng besedia deka mantu kaban parti mutarka penyarut ke nyadi nuntung parti nya diatu.

Taja pan, Yong enggau nimbal enggau panjai peyarut ke ditapi parti ke kala ngangkatka nama iya empu, Yong madah iya udah madahka penyendia diri deka meri penemu iya mantu kaban parti nya, ari pun suba.

Iya madah enti sida iya begunaka penemu iya, sida (kaban parti) patut betemu enggau iya empu, ngambika lalau ke deka dikenataika ngemenuhka utai ke dikarap kededua piak.

“Enti sida iya begunaka penemu aku, sida iya patut datai lalu betemu enggau aku empu laban aku udah besedia ari pun suba sebedau penyarut nya nambah.

“Aku mega nadai meri sebarang komitmen ngagai parti kelimpah ari besedia mantu meri jaku ajar tauka lalau ke nyangka ulih mantu sida iya,” ku Yong madah lebuh dikerandau ba siti atur pengawa ditu, kemari.

Yong maya dikerandau mega, ngenadaika diri ba penemu orang bukai, alai iya deka muka parti baru nganti SUPP, laban baka ke ditemu mensia mayuh, Yong udah pinchin ari dunya politik.

Taja pan ari pun suba, Yong kala madahka diri deka pinchin ari dunya politik, sebedau pengawa bepilih besai menua PRU 13 bedau lama tu tadi, tang ketegal Barisan Nasional (BN), iya diasuh bediri baru taja pan kala madah enggai.

“Muka parti baru? Enda aku nemu pasal pekara tu? Nama kebuah? Kita ka enggau aku, pia?,” ku iya lebuh nyaut pemberita enggau jaku tundi iya.

Bedau lama tu tadi, Sekretari Besai SUPP Dr Sim Kui Hian, kena 9 Januari, netapka kala nerima surat meri kebuah ari ROS bekaul enggau dua buah pampang parti nya ke kena kinsil ulih ROS, iya nya pampang SUPP Bekenu enggau Piasau.

ROS sebedau tu kala nganjung surat ngagai dua buah pampang nya kena 6 Jun 2013 tang enda puas ati enggau saut ke diberi kededua pampang nya, ke ngujungka pampang nya dikinsil.

Advertisement