SWP deka bekerejasama, ngenegap parti seraya ngepunka kerejasama ke engkeman antara gempung penyakal
KUCHING: Sarawak Workers Party (SWP) mutuska runding deka bekerejasama enggau raban penyakal ke alai penerang nya dipansut ba pengerami bejadi SWP pampang Padungan ditu, malam ensanus.
Presiden Larry Sng madah, taja pan pampang nya keterubah iya ngarika parti ba kandang mengeri, SWP nadai ngembuan niat ati deka ngelangkah tauka ngalah parti ti megai sitak nya.
“Pampang Padungan ditumbuh enggau tuju ngenegap sukung ari raban ke diau di Kuching lalu ukai ketegal kitai deka besemekih enggau parti bakih bukai.
“Kitai deka berati chara kitai ulih bekerejasama, ngenegap parti sereta bela pechayaka pangan diri lalu malam tu meh maya kitai ngepunka kerejasama manah tu,” ku iya bejaku ba atur pengawa ngintu Taun Baru China ke mega nyerumba pengawa bejadi pampang.
Larry mega madah parti deka nyadi parti ti ngarika semua pupu raban bansa lalu ukai semina ngarika rayat di menua pesisir tang mega parti ungkup semua peranak Sarawak.
Kelimpah ari nya, iya mega madah SWP benung ransing matak mayuh agi raban ketuai ti ngembuan pengelandik ngaul rayat masuk parti lalu pia mega matak mayuh agi raban.
“Maya pengawa bepilih parlimen suba ke alai kitai bediri ba enam sitak, parti nerima enda kurang ari 40,000 kaban. Pengudah beratika pemutus pengawa bepilih nya, parti ngasaika pekara ti patut dikemerat diatu iya nya matak mayuh agi orang ke landik nyadi ketuai ke dalam parti.
“Ketuai ti nemu ngaul sereta diterima rayat lalu semua jaku ari iya mega deka didinga rayat. Ketuai ti seruran begulai enggau rayat ba maya tusah mega maya lantang. Nya meh bansa ketuai ti deka digiga SWP,” ku iya.
Dulu agi ari nya, Sekretari Besai SWP ke mega Chairman pampang Padungan Dr Ong Lak Sai meri jamin parti enda ngelangkah status tauka adan pangku pengawa ba mengeri Kuching lalu netapka deka ngadu kerejasama rapit enggau pangan ari parti ke megai kuasa.
“Tang enti kandang mengeri Kuching dibagi baru lalu sitak baru ditumbuh, kitai deka minta nengah randau ngambika parti diberi awak bediri,” ku iya.
Dr Ong mega madahka mayuh agi pampang parti deka ditumbuhka ba kandang mengeri ba awak ke semak nyengkaum di Sri Aman enggau Pelagus.
Bela datai raban ketuai DAP, ADUN Padungan Wong King Wei, ADUN Pending Violet Yong, ADUN Batu Kawa Christina Chiew enggau MP Stampin Julian Tan.